Ózbekstannyń birinshi prezıdenti Islam Kárimovtiń nemeresi kishi Islam Kárimov Ulybrıtanıa bıliginen saıası baspana surady. Bul týraly onyń Londondaǵy advokaty málimdedi.

Budan buryn Kárimovtiń nemeresi sheteldik BAQ-qa bergen bir suhbatynda óziniń anasy Gúlnar Kárimova jaıly habar estigenin aıtqan edi. Ol «osy habardan keıin Ulybrıtanıa bıligi saıası baspana berý týraly oılanady», – dep úmittenedi.

«Barlyq qujat daıyn bolǵanda men saıası baspana surap, ótinish jazamyn. Meniń anamnyń ómirinde ózgerister boldy. Qandaı ózgeris ekeni qupıa kúıinde qalsyn. Alaıda men anama qatysty birneshe habar aldym. Oǵan ózgeler sený túgili, kóz aldaryna da elestete almaıdy», – dep málimdegen bolatyn kishi Islam Kárimov.

Eske salaıyq, osyǵan deıin Ózbekstan bıligi Gúlnar Kárimovany jemqorlyqqa qatysy bar dep aıyptaǵan edi.

Keıin ózbekstandyq BAQ-ta Islam Kárimovtiń úlken qyzy sotqa tartylady degen aqparat tarady. Bul týraly eks-prezıdenttiń nemeresi: «Meniń anyq biletinim – anamnyń jemqorlyqqa qatysy bar deıtindeı naqty dálel joq, barlyǵy burmalanǵan», – dep suhbat bergen.

Ol Ózbekstannyń Ulttyq qaýipsizdik qyzmeti qınaý men qorlaý arqyly qylmystyq isti júrgizip, ózderine qajetti aqparatty alyp otyrǵanyn ashyq aıtty.

«Kýágerlerdiń kópshiligi úsh-tórt jyl Ulttyq qaýipsizdik qyzmetinde qamaýda bolǵan. Olardy kez kelgen qaǵazǵa qol qoıýǵa kóndirýge bolady. UQQ túrmesinde tórt jyl otyrǵan adam, tipti, óziniń qatysy bolmasa da, kez kelgen qylmysty moıyndaýy múmkin. Bul – túsinikti jaıt», – deıdi ol.

Kishi Kárimovtiń aıtýynsha, atasy qyzynyń saıasatqa aralasýyna qarsy bolǵan. Islam Kárimovke onyń belsendiligi unamaǵan.

«Meniń atam únemi anama: «Menen asyp ketpeýiń kerek», –  deıtin. Anam halyqtyń senimi men súıispenshiligin ıelenip, taǵyn tartyp alady dep qorqatyn. Atam úıde teledıdardan anamdy jıi kóretin. Onyń ashýlanatyny sonshalyq, biz kóptegen jobany odan jasyrýǵa tyrystyq. Anam talaı jumysyn qupıa saqtady. Tipti, teledıdardan onyń jobasy kórsetilgende «meniń jobam» dep aıta almaıtyn. Eger ony bilse, atam: «Sen menen bılik tartyp alǵyń keledi», – dep kúdiktener edi», – deıdi Kárimovtiń nemeresi.

Islam Kárimov qaıtys bolardyń aldynda onyń týǵan qyzy úıqamaqta otyrdy. Qazir Gúlnar Kárimovanyń tiri ekeninen basqa naqty aqparat joq.