QazUÝ-da úndi halqynyń dana tulǵasy, uly oıshyl Karamchand Mahatma Gandı atyndaǵy ortalyq ashyldy, dep jazady Qamshy.kz aqparat agenttigi.
Shyǵystaný fakúltetiniń Taıaý Shyǵys jáne Ońtústik Azıa kafedrasynyń uıymdastyrýymen ótken sharaǵa Úndistan Respýblıkasynyń Qazaqstandaǵy Tótenshe jáne Ókiletti Elshisi Prabhat Kýmar, Úndistan Respýblıkasynyń Almaty qalasyndaǵy Bas konsýly Shrı Martın Sırıas Slemens, Qazaqstandaǵy Úndistan Respýblıkasynyń áskerı attashesi polkovnık Mılan Nalavade jáne QazUÝ oqytýshylary men stýdentteri qatysty.
Sóz alǵan QazUÝ rektory «Búgin tusaýy kesilip otyrǵan ortalyq úndi halqynyń dana tulǵasy Mahatma Gandı esimimen tikeleı baılanysty. «Álemniń ózgerýin qalasań, sol ózgerýdiń alǵashqysy óziń bol» – degen naqyl sózdi mura etip qaldyrǵan Mahatma Gandı Úndistandy Ulybrıtanıadan azat etý úshin kúresken ǵasyr adamy.
Úndi topyraǵynyń qoınaýyndaǵy syrǵa toly tarıhty, onyń mádenı baı murasyn, úndi tilderi men ádebıetin zertteıtin mamandardy daıyndaý maqsatymen 1992 jyly ýnıversıtetimizdiń shyǵystaný fakúltetinde únditaný bólimi ashyldy. Jıyrma alty jyl ishinde únditaný bólimin hındı, ýrdý tilderin meńgergen eki júzge jýyq shákirt bitirip shyqty. Olardyń ishinde, bakalavr, magıstr jáne PhD doktorlar bar.
Únditanýshy mamandar el aýmaǵynda ǵana emes shet elderdegi beldi JOO-da óz bilimderin shyńdap otyrady. Shyǵystaný fakúlteti, sonyń ishinde únditaný bólimi Halyqaralyq baǵdarlamalar men jobalar sheńberinde Úndistanmen ICCR (mádenı baılanystar boıynsha úndi keńesi) baǵdarlamasy, ITEC (halyqaralyq tehnıka-ekonomıkalyq yntymaqtastyq) baǵdarlamasy aıasynda Úndistandaǵy Delı ýnıversıteti, Dj. Nerý ýnıversıteti, Agra qalasyndaǵy Hındı tili ortalyqtary, Djamıa Mılıa ýnıversıeti syndy ýnıversıtettermen halyqaralyq baılanys jasap, akademıalyq almasýlardy júzege asyryp otyrady. 2015 jyldan beri ulttyq ýnıversıtetimizde únditaný bólimi janynan Úndistan Respýblıkasy qarjylandyratyn «Shantı» ıoga ortalyǵy jumys jasaıdy. 2015 jyldyń naýryz aıynda ál-Farabı atyndaǵy Qazaq ulttyq ýnıversıtetiniń delegasıasynyń yntymaqtastyq ornatý jáne tájirıbemen almasý maqsatynda Ulybrıtanıa, BAÁ, AQSH, Sıngapýr jáne t.b. álemniń kóptegen memleketterinde fılıaldary bar Úndistannyń iri JOO-nyń biri «Amıtı» ýnıversıtetinde, sonymen qatar Delı ýnıversıteti jáne Úndistan tehnologıalyq ınstıtýtyna resmı is saparmen barýy eki el arasyndaǵy halyqaralyq baılanystyń sımvoly bolmaq», - dedi Ǵalym Mutanov.
Kezekte sóz alǵan Úndistan Respýblıkasynyń Qazaqstandaǵy Tótenshe jáne Ókiletti Elshisi Prabhat Kýmar: «Mahatma Gandı kúresti qarý kúshimen emes, beıbit jolmen júrgize otyryp, uly maqsat jolynda qandaı da bir kúsh qoldanýǵa jan-tánimen qarsy boldy. Shyn mánindegi ult kósemi dárejesine kóterilgen ol uly murat jolynda qaıtpas jiger tanytqan tulǵa. Gandıdiń ultynyń bolashaǵy jolynda etken eńbegin búgingi úndi halqy máńgi este tutyp, jyl saıyn kósemniń týǵan kúnine oraı eske alý sharasy ótedi. Búginde Mahatma Gandı ortalyǵynyń QazUÝ-da ashylýy Úndistan men Qazaqstannyń myzǵymas dostyǵynyń dáleli», -dedi elshi.
Shara barysynda basqa da qatysýshylar qazaqstandyqtar men Úndistan halqyn búgingi merekemen quttyqtaı otyryp, únditaný bólimi janynan ashylǵan Mahatma Gandı ortalyǵynda atqarylatyn is sharalar jemisti bolyp, eki el arasyndaǵy bilim, ǵylym, mádenıet salasyndaǵy baılanys dostyq kópiri jalǵasyn taba beredi degen úmitterin jetkizdi. Sonymen qatar shara sońynda qazaq, orys, aǵylshyn jáne hındı tilderindegi otandyq jáne sheteldik únditanýshy-ǵalymdardyń materıaldary usynylǵan kitap kórmesi uıymdastyrylyp, «Hındı-qazaq, qazaq-hındı sózdigi» kitabynyń tusaýkeser rásimi ótti.
