Tanymal sazger Jarylqasyn Dáýlet kórermen nazaryna óz ıntellektýaldyq jobasyn usyndy. Jobanyń basty maqsaty – án arqyly tyńdarmandy ulttyq qundylyqtarǵa baýlý, ıgi isterge shaqyrý jáne qazaqtyń umytylyp bara jatqan dástúrin jańǵyrtý.
Tanys bolyńyzdar. Ánshi Aman Áben 1995 jyly Aqtóbe qalasynda dúnıege kelgen.

2012 jyly baıan synybyn bitirdi.
2013-2017 jyldary Qazaq Ulttyq óner ýnıversıtetiniń kolejinde estrada mamandyǵy boıynsha bilim aldy.
Gıtara men fortepıanoda oınaıdy.
Amannyń prodúseri Jarylqasyn Dáýlet jańa jobasy týraly Qamshy.kz aqparat agenttigine tolyǵyraq aıtyp berdi.

- Án, terme – qazaqtyń qanyna sińgen tárbıe quraly. Qazaq balalaryn termemen, jyrmen tárbıelegen. Aqtamberdi, Mahambet, Shalkıiz, Dýlat jyraýlar – soǵan dálel. Abylaı hannyń Buqarǵa oń tizesinen oryn berýi tegin emes. Sondyqtan Aman Áben óz ánderi arqyly ulttyq qundylyqty dáripteıdi. Al ulttyq qundylyq uıattan bastaý alady. Ýaqyt óte kele adamdardyń qundylyǵy ózgere bastady. Kindik ashyp, jalańashtanyp, salmaǵy joq án aıtýǵa arlanbaıtyn boldyq. Osyndaıdan sál de bolsa qoǵamdy arashalaıyq degen maqsatpen osy jobany qolǵa alyp otyrmyn.
Qazir jeńil, qyzyqty áýenderdi súısinip tyńdaımyz da, marjany tógilip tursa da, aýyrlaý ánderdi qabyldaı almaımyz. Jańa jobadaǵy án mátinderi jastardyń esinde qalatyndaı bolýy múmkin. Sol arqyly ulttyq qundylyqtarymyzdy nasıhattaǵaly otyramyz.
Qazir jańa án jazdyrdyq. Onda «et jep ket» degen sóz jıi qoldanylady.
«Dastarhanym keń-keń,
Tórime shyq sen-sen.
Tórime shyq, tórlet,
Et jep ket», - degen sózderi bar.
Qarap otyrsyń, sózi birtúrli, biraq onyń astarynan qonaqjaılyqty baıqaýǵa bolady. Biz jeńil ánge barýymyz múmkin, biraq jeńil sózge barmaımyz.
Kez kelgen qazaqtyń úıine barsańyz et jep qaıtasyz. Qazaq úshin etke shaqyrý saıası arena ispettes. Qazaqtar bireýge ókpelese de, etke shaqyryp, dastarhanǵa tisin qaqpaı maldyń basyn qoıǵan. Qazaq dushpanyna deıin et berip otyr. Sondyqtan osy án arqyly «qazaq sondaı keremet bolatyn, sen de sondaı bol» degendi jetkizgimiz keldi.
- Aman Áben qandaı janrda án aıtady?
- Estrada janrynda. Sebebi onyń daýysy estradaǵa jaqsy keledi. Estrada – halyqqa eń jaqyn janr. Tyńdarman Ramazan Stamǵazıevti tanymaýy múmkin, biraq estradada júrgen ánshini biledi.
Qazir ánshiler bizdiń úgit-nasıhat quralymyzǵa aınaldy. Kóp jastar ánshilerge elikteıdi. Solarǵa uqsaǵysy keledi. Sondyqtan halyqtyń aldynda júrip, ónerińdi pash etýdiń qanshalyqty mańyzdy ekenin túsinemiz.
Máselen, men Ninety one-dy nege jekkórdim? Qyztekelerdiń syqpytyn jasap shyǵardy ǵoı. Bul – sondaılarǵa qarama-qarsy daıyndalyp jatqan joba.
Bizdiń negizgi prınsıpimiz – barǵan jerde «seniń atań qazaq bolǵan, atań qazaq ótirik aıtpaǵan, atań qazaq sóz kótergen, atań qazaq namysshyl bolǵan, at tóbelindeı qazaq keń-baıtaq jerdi ustaǵan» degendi aıtyp júrý.
Ánimiz jastardy qabyldaýyna laıyqtalyp jasalýy múmkin. Qazaqtyń qarakóz qyzdary ózge ult ókilderiniń eteginen ustap ketip jatyr. Osy máselege qatysty da án jazdyrdyq. Onyń sózin aıtysker aqyn Birjan Baıtýov jazdy. Jaqynda kórermen nazaryna usynylady. Onda «Nege ózgege turmysqa shyǵasyń?!», - degen sóz joq. «Qaryndasym, sen óz aıdynyńnan ushyp qaıda barasyń?», - degen sarynda jazylǵan án. Onyń qaıyrmasynda qyzdy shaǵalaǵa teńep, «óz aıdynynan ushyp ketip, shalshyq sýǵa shomylǵan shaǵalam-aı», - dep astarly jetkizedi. «Ketpeshi qaryndasym», - degen ún jatyr onda.
Aman Áben komersıalyq joba emes. Oǵan zor úmit artylyp, bıik maqsat qoıylady. Sondyqtan oǵan ońaı soqpaýy múmkin.
Án arqyly kóptegen áleýmettik máseleni kótermekpiz. Tórt ánge daýys jazdyryp qoıdyq. Eki ánge klıp túsirý josparda bar. Ánderi jurtqa ótpeı qalýy múmkin.
Áńgimeńizge raqmet!
Aman Ábenniń ánderin ankui.kz saıtynan tyńdaı alasyzdar!