Jańa zań qýma saýdany quryqtaı ala ma?

2013 jyldyń 28 qańtarynda elimizdiń Bas prokýratýrasy Ulttyq Bankpen jáne ózge de múddeli organdarmen birlesip «Keıbir zańnamalyq aktilerine qarjy (ınvestısıalyq) pıramıdalarynyń qyzmetine qarsy is-qımyl máseleleri boıynsha ózgerister men tolyqtyrýlar engizý týraly» Zań jobasyn daıyndady. Bul zańnyń basty maqsaty − elimizde qarjy pıramıdalarynyń jolyn kesý jáne jumys isteýine jol bermeý, qarjy pıramıdalarynyń qyzmetimen baılanysty zańǵa qaıshy áreketterden azamattardyń quqyqtary men zańdy múddelerin qorǵaýǵa baǵyttalǵan quqyqtyq baza qalyptastyrý. Aıta ketý kerek, qarjy pıramıdalaryn joıýǵa baǵyttalǵan zań jobasy ústimizdegi jyldyń qyrkúıek aıynda jasalynyp bitýi tıis edi. Biraq jańa zań jarty jylǵa kesheýildep qabyldansa da, qarjylyq pıramıdanyń barlyq túrlerin joıýǵa áli de qaýqarsyz. Máselen zańda: «Taýarlardy nemese qyzmet kórsetýlerdi, óndirý nemese satyp alý-satý bolmaǵan jaǵdaıda adamdardyń qarajat, basqa da múlikterin tartýǵa bolmaıdy» delingen. Demek, tikeleı saýda jáne jelilik marketıńtiń atyn jamylyp, qarjylyq pıramıda júıesi boıynsha kópshiliktiń qaltasyn qaǵyp, qomaqty qarjyny shetel asyryp jatqan saýda túrleri taǵy da esh jazasyz qalady degen sóz. Elimizde keń taralǵan, karjylyq pıramıdanyń negizinde júrgiziletin Quest.net, Tánshı sekildi jelilik irili-usaqty saýda oshaqtaryna esh áseri bolmaıdy. Álemniń kóptegen elderi atap aıtqanda, Avstralıa, Brazılıa, Velıkobrıtanıa, Kanada, Kıtaı, Fransıa, Germanıa, Italıa, Iran, Iaponıa sekildi damyǵan memleketter qarjylyq pıramıda men soǵan uqsas saýda túrlerine áldeqashan tyıym salǵan. Al bizdiń elge jelilik marketıń pen qarjy pıramıdasynyń arajigin ajyratý úshin taǵy biraz jyl kerek sekildi. Sýret: nwm.az saıtynan

Jańa zań qýma saýdany quryqtaı ala ma?

Qatysty Maqalalar