QR BǴM vıse-mınıstri Asqat Aımaǵambetovtyń aıtýynsha, Qazaqstanda mektepter men oqýshylar jáne olardyń ata-analary arasynda kelisim bekitý josparlanyp otyr. 

Bul jaıynda  Qamshy.kz aqparat agenttigi QazAqparat málimetine súıenip habarlaıdy.

«Pedagogtardy qorǵaý óte mańyzdy másele. Búginde biz Úkimet qaýlysyna ózgeris engizýdemiz, ıaǵnı bul bilim berý uıymdaryna qabyldaýdyń úlgilik erejesine qatysty. Osy úlgilik erejelerde «kelisimshart» degen jańa túsinikti engizýdemiz. Atap aıtqanda, bizde balabaqshalarda, ýnıversıtetterde kelisimsharttar bar. Alaıda osyndaı qujattar mektepterde, mektep pen ata-analar arasynda búginge deıin bolǵan emes. Sondyqtan bizdiń pedagogtardy qorǵaý maqsatynda, sondaı-aq ár taraptyń quqyǵy men mindettemelerin reglamentteý úshin mektepterde mindetti túrde kelisimsharttardy bekitýdi engizý týraly sheshim qabyldadyq. Bul turǵyda kim ne úshin jaýapty ekendigi aıqyndalady. Bizdińshe, bul qadam búginde baıqalǵan problemalarǵa óz áserin tıgizetin bolady», - dedi Aımaǵambetov.