«Jas Otan» Ortalyq keńes músheligine úmitkerlerdi saılaý aıaqtaldy. 18 qańtar kúni jastar uıymy alǵash ret keńestiń 16 múshesi daýys berý arqyly tańdalatynyn jarıa etti. Jeńimpazdar qatarynda «Ninety One» tobynyń solısi Dýlat Muhametqalıev pen qaıyrymdylyqpen aınalysatyn qaraǵandylyq Nıaz Sýndıtalıev te bar, dep jazady Qamshy.kz aqparat agenttigi.
1 aıǵa sozylǵan saılaý «Nur Otan» partıasynyń jastar qanatynda ǵana emes, jalpy memlekettik jastar saıasatynda, qoǵamda úlken rezonans týdyrdy. Saılaý nátıjesi týraly sandar sóıleıdi: respýblıka boıynsha 363 jas kóshbasshy saılaýǵa qatysýǵa nıet bildirdi, #jasotansailau heshtegi 1 458 ret qoldanyldy, qatysýshylardyń vıdeoúndeýin jalpy 100 000-nan astam adam laık basty, telegrammda daýys bergen 38 857 adamnyń 14 467-si «Jas Otan» quramynda. Al qazir «Jas Otan»-nyń resmı telegramm kanalyn 9 myńnan astam qoldanýshy oqıdy, osylaısha uıymdar arasynda Qazaqstanda eń kóp oqyrmany bar kanaldar qataryna qosyldy.
4 jyl boıy jańa saılanǵan 16 kóshbasshy keńes quramyna kiretin qalǵan 16 aımaqtyq fılıaldardyń tóraǵalarymen birge jumys atqarady. Al Ortalyq keńesti «Jas Otan» JQ tóraǵasy Danıar Súndetbaev basqarady.
Danıar Súndetbaev, «Jas Otan» JQ tóraǵasy:
«Ortalyq keńes demokratıalyq jolmen saılandy. Ár aımaqtyń kóshbasshysyn jastar ózderi anyqtady. Sońǵy kezeńge jetken qatysýshylardyń barlyǵy óz aımaqtarynda bedeldi, jastar arasynda qurmetke ıe, eli úshin aıanbaı eńbek etýge daıyn azamattar men azamatshalar. Qatysýshylardyń barlyǵyna ózderine artylatyn aýyr júkti kóretýge daıyndyqtary men jastar saıasatynda kórsetken belsendilikteri úshin alǵys aıtamyn. Árıne tehnıkalyq qosymshalardyń kómegimen daýys sanyn ózgertýge tyrysqan úmitkerler boldy, olardy der kezinde anyqtadyq. Saılaýdyń ashyq jáne ádil bolǵanyn senimmen aıta alamyn. «Jas Otan» ol saılanǵan kóshbasshylar emes, ol – Qazaqstannyń barsha jastary. Biz kez kelgen jastyń usynysyn tyńdap, birge jumys jasaýǵa daıynbyz».
Saılanǵan keńes músheleri «Jas Otan»-nyń IV Sezinde bas qosady jáne keńes jumysynyń bolashaq jospary jáne qyzmetimen tanysady.
Astana qalasy boıynsha 5 úmitkerdiń arasynan úzdik shyqqan Arutas betondyq ónimder shyǵaratyn zaýytynyń basshysy Alımkýlov Bekjan saılaý týraly:
«Elimizdegi jas kásipkerlerdi qoldaý maqsatynda osy saılaýǵa óz úmitkerligimdi usyndym. Saılaý tartysty jáne qyzyq ótti. Endi jeńiske jetken 16 kóshbasshyny úlken synaq pen kóptegen jumys kútip tur. Bizdi qoldaǵan jáne daýys bergen jastardyń úmitin aqtaýymyz qajet».
«Jas Otan» Jastar qanatynyń Ortalyq keńes músheligine úmitker 16 jeńimpazdyń tizimi:
Almaty qalasy – Dýlat Mýhametqalıev, «Ninety One» tobynyń solısi
Astana qalasy – Bekjan Alımkýlov, Arutas betondyq ónimder shyǵaratyn zaýytynyń basshysy
Aqmola oblysy – Baıramov Islam, stýdent, Kókshetaý jastarynyń kóshbasshysy
Aqtóbe oblysy – Abdrahmanov Qýanshybek, «Aktobemýnaımashkomplekt» JSHS temir ustasy
Almaty oblysy – Abylqas Merýert, «Taldyqorǵan medısınalyq koleji» Jastar isi jónindegi komıtet tóraıymy
Atyraý oblysy – Konysbaev Ilás, «Daryn» memlekettik syılyǵynyń laýreaty
BQO – Suńǵatov Jandos, BQO «Jas Otan» jastar qanatynyń menedjeri
Jambyl oblysy – Serikbol Berikqoja, Taraz qalalyq maslıhat depýtaty
Qaraǵandy oblysy – Sýndıtalıev Nıaz, qoǵam qaıratkeri, múgedek jastar máselesin kóteredi
Qostanaı oblysy – Jýsýpov Abaı, Qostanaı memlekettik pedagogıkalyq ınstıtýty, stýdentter men jastar uıymdarymen jumys bóliminiń bastyǵy
Qyzylorda oblysy – Eralıev Maǵjan, 1000 adamdy jumyspen qamtyp otyrǵan jas kásipker
Mańǵystaý oblysy – Qurmanǵalıev Ǵanı, Jańaózen qalasy jastar isi jónindegi komıtet basshysy
OQO – Abylaı Mýsabekov, OQO ákimi apparaty «Qoǵamdyq kelisim» KMM aýdandyq fılıalynyń jetekshisi
Pavlodar oblysy – Qınaıatov Serikbolsyn, Pavlodar oblystyq «Jas Otan» jastar qanatynyń menedjeri
SQO – Armanov Rýstem, debat týrnırleriniń qatysýshysy, «Úzdik spıker» - 2017
SHQO – Baltabekov Erkebulan, SHQO ishki saıasat basqarmasynyń bas mamany.
