Búgin QR Eńbek jáne halyqty áleýmettik qorǵaý mınıstrliginiń medıa-ortalyǵynda “www.enbek.kz portalynyń alǵashqy jumys nátıjeleri” taqyrybynda baspasóz máslıhaty ótti. Jıynǵa QR Eńbek jáne halyqty áleýmettik qorǵaý vıse-mınıstri N.B.Áltaev pen «Eńbek resýrstaryn damytý ortalyǵy» AQ prezıdenti Arǵyndyqov D.R. qatysty, dep jazady Qamshy.kz aqparat agenttigi QR Eńbek jáne halyqty áleýmettik qorǵaý mınıstrliginiń baspasóz qyzmetine silteme jasaı otyryp.
www.enbek.kz Elektrondyq eńbek bırjasy 2018 jyldyń qańtarynda iske qosyldy. Saıt jumys izdeýshiler men jumys berýshilerdi, sondaı-aq memlekettik jumyspen qamtý organdary, jumyspen qamtýdyń jeke agenttikteri men jumysqa ornalasý boıynsha ınternet-alańdardy biriktiredi.
Portalǵa 34 jumyspen qamtý jeke agenttikteri, 5 BAQ pen jumys izdeý boıynsha 4 saıt kirdi: hipo.kz, market.kz, rabota.nur.kz, zarplata.kz. Bir aıdyń ishinde www.enbek.kz saıtyna 50 myńnan astam túıindeme men 30 myńnan astam bos oryn týraly usynys túsken.
Statısıkaǵa sáıkes, jumys berýshiler kóbine kelesi mamandyqtar boıynsha bos oryndar jarıalaıdy:
- qosalqy qyzmetker - 1 695,
- bala tárbıleýshisi - 406,
- kólik júrgizýshisi - 405,
- ónidiristik jáne qyzmettik oryndardy tazalaýshy - 378,
- medbıke - 335,
- bala tárbıeleýshisiniń kómekshisi – 286.
Al jumys izdeýshiler boıynsha statısıka tómendegideı:
- qosalqy qyzmetker – 8 406,
- áleýmettik qyzmetker – 2 542,
- zańger – 1 022,
- kólik júrgizýshisi – 840,
«Elektrondyq eńbek bırjasy ákimshilik kedergilerdi joıyp, bos jumys oryndary men jumys izdeýshiler týraly aqparatty bir arnaǵa toǵystyrýǵa múmkindik beredi. Oǵan qosa, portal halyqty jumyspen qamtý ortalyqtaryn HR-qyzmetke aınaldyrýǵa, kadrlik agenttikterge ortaq aqparattyq bazany qoldanýǵa múmkindik beredi. Statısıkaǵa júginsek, elimizde 2 mln-nan astam adam únemi «qozǵalysta», ıaǵnı biri eńbek naryǵynan ketedi, biri jumys aýystyrsa, kelesisi qyzmetke turady. 1,7 mln-y óz betimen jumys tabady, alaıda olardyń barlyǵy derlik tıimdi qyzmetke turdy dep aıtýǵa bolmaıdy», - deıdi vıse-mınıstr Nurjan Áltaev.
Buǵan deıin habarlaǵanymyzdaı, Elektrondy eńbek bırjasy 2017 jyly qazan aıynda Astana, Almaty, Pavlodar jáne Shymkent qalalarynyń Jumyspen qamtý ortalyqtarynda pılottyq joba retinde iske qosyldy. Ústimizdegi jyldyń 1 qańtarynan bastap Qazaqstannyń búkil aýmaǵy qamtyldy.
«Elektrondyq eńbek bırjasy azamattyń áleýmettik jaǵdaıyna qaramastan árbir adamǵa jumysqa ornalasýǵa kómektesedi. Jalaqysy joǵary jumys mamandarǵa, basshylarǵa jáne mamandyǵy bar tulǵalarǵa usynylady. Búgingi kúni portalda jalaqysy 200 000 teńgeden bastalatyn 440 bos jumys oryny jarıalanǵan», – dep atap ótti «Eńbek resýrstaryn damytý ortalyǵy» AQ prezıdenti Dáýlet Arǵyndyqov.
Jyl basynan beri www.enbek.kz saıtynyń qaralymy 70 myńǵa deıin jetti. Búgingi tańda portalda 49 myńnan astam jumys izdeýshi men 14 myńǵa jýyq jumys berýshi tirkeldi.
