«Jaqsynyń aty, ǵalymnyń haty ólmeıdi» deıdi bizdiń dana halqymyz. Ústimizdegi jyldyń 8-shi aqpany kúni Elordamyz-Astana qalasyna qaraıtyn «Internasıonalnyı» eldi-mekeninde aýyl ardagerleri Sátti Kárimuly men Raıhan Kárimkelininiń shańyraǵynda júrek tebirenterlik qýanyshty oqıǵa ótti. Mynaý jaryq dúnıege osy jyldyń 28 qańtarynda kelgen nemerelerine «Ersaıyn Manaev» atyndaǵy meshittiń bas ımamy Ibrahım Smataev azan shaqyryp, seniń atyń Sádibek dep jeti márte qaıtalap at qoıdy. Sol sátte, kishkentaı Sádibekti halqymyzdyń úlken azamattarymyzdyń biri Sádibek Túgel aǵa kóterip turdy. Biz osy ádemi rásimdi kózimizben kórip, kýá boldyq. Merekege halyq kóp jınaldy. Biz, óz tarapymyzdyn olardan alǵan áserlerimen bólisýdi suradyq: «Dáýlet Sáttiuly kishkentaı Sádibektiń ákesi: -«Sádibek meniń ekinshi ulym. Úlkenimniń aty –Sultanbek. Ol týra 2-jasta. Men úshin Sádibek qasıetti esim.Ult qaıratkeri Sádibek aǵa Túgel naqty istiń adamy. Sádibek aǵa basqalarmen salystyrǵanda, aıtqan ýádesin qaıtse de oryndaıtyn,sózi men isi bir jerden shyǵatyn azamat. Sol úshin ony qurmet tutamyn. Qulager eskertkishi sonyń naǵyz dáleli emes pe. Osy jerden ótken saıyn bir toqtap ótem.Aǵanyń jigittik márttigine tántimin. Sondyqtan da, yrymdap balama aǵanyń atyn qoıyp otyrmyn».

Atasy Sátti Kárimuly: -«Bizdiń úıdiń janynda «Qulager» at sportynyń klýby bar. Qolym bosaǵanda nemerelerimdi sonda aparamyn. Atqa mingizip, serýendetemin. Sákeń osy klýbtyń uıymdastyrýshylarynyń biri. Onyń nebir úlkendi-kishi jarystarǵa bilikti basshylyq jasaǵanyn kórip júrmin. Júregi elim jerim dep soǵady.Jalpy biz Qulager desek úsh tulǵany erekshe aıtamyz. Olar: Aqan seri, İlás Jansúgirov jáne Sádibek Túgel. Ol kisiniń atqarǵan san-alýan jobalary elge ónege, urpaqqa úlgi. Nesin aıtasyz, atasy retinde Sádibek esimin qýana qabyldadym.Nemeremniń Sákeńdeı elge tanymal, qaıratker-azamat bolǵanyn qalaımyn». QR eńbek sińirgen qaıratkeri, jazýshy, qoǵam qaıratkeri Sádibek Túgel:-«Qýanyshymdy jasyra almaı,úlken áserde, tolqyp turmyn. Bul senim maǵan úlken jaýapkershilik júkteıdi.60-jyldyq mereı toıymnyń aldynda erekshe syı boldy. Kishkene, sábı Sádibektiń joly ashyq bolsyn deımin!». Úlken baq, ulaǵatty jumystardy ózi bastap,tolyǵymen oryndap shyǵatyn tulǵa azamattarǵa ǵana buıyrady. Osy jerde Sádibek aǵanyń týǵan ultyna arnalǵan eńbekteriniń nátıjesinde, halqymyzdyń mańdaıy jarqyraǵan asyldarynyń biri bolǵanyna kózim jetti.

Nurlan Saǵynaı, Astana qalasy