QR Din isteri jáne azamattyq qoǵam vıse-mınıstri Berik Aryn bastaǵan qazaqstandyq delegasıa 2018 jylǵy 20-21 aqpanda Katardyń astanasy Doha qalasynda ótken «Din jáne adam quqyǵy» taqyrybynda uıymdastyrylǵan dinder dıalogynyń 13-shi Doha konferensıasyna qatysty.

Vıse-mınıstr B. Aryn konferensıada «Din bostandyǵy jáne dinı tájirıbe» taqyrybynda óziniń baıandamasyn oqyp,  qatysýshylardy  etnosaralyq jáne konfesıaaralyq kelisimdi qamtamasyz etýdegi Qazaqstannyń tájirıbesimen tanystyrdy. Sondaı-aq, Memleket basshysy Nursultan Ábishuly Nazarbaevtyń álemdik jáne dástúrli dinder sezin shaqyrý jónindegi jahandyq bastamasyna tolyǵyraq toqtalyp ótti.

Budan bólek, forým delegattary memleket pen dinder arasyndaǵy ózara is-qımyldyń qazaqstandyq úlgisin qurý, azamattardyń ar-ojdan bostandyǵy quqyǵyn qamtamasyz etý jónindegi zańnamalyq bastamalar, barlyq zańdy dinı birlestiktermen syndarly yntymaqtastyqty qamtamasyz etý jáne el damýynyń zaıyrly prınsıpterin nyǵaıtý jónindegi Qazaqstan Úkimeti qabyldap jatqan sharalar týraly habardar boldy.

 «Elbasymyzdyń salıqaly saıasatynyń arqasynda Qazaqstan ártúrli dindi ustanatyn  adamdardyń beıbit  ómir súrýiniń ózindik, erekshe úlgisin qura aldy»- dep atap ótti B.Aryn.

Jalpy alǵanda, konferensıaǵa qatysýshylar dinı bostandyqtar men dinı tájirıbeler, saıası, ekonomıkalyq jáne áleýmettik salalardaǵy adam quqyqtary, jeke adamdardyń jáne toptardyń quqyqtarynyń buzylýyna dinniń qatynasy, qasıetti jazbarlar men ósıetterdegi  adam quqyqtary, dinı qundylyqtardy adam quqyqtary týraly zańnamaǵa engizýdiń tabysty tájirıbesi sıaqty biraqatar ózekti máselelerdi talqylady.

İs-sharaǵa AQSH, Kanada, Shvesıa, Italıa, Ulybrıtanıa, Belgıa, Malaızıa, Argentına jáne basqa da eýropa, arab, azıa  elderinen, sondaı-aq   TMD memleketterinen kelgen dinder men órkenıetter dıalogy máselelerin zertteýmen aınalysatyn dinı qaıratkerler, ǵalymdar, teologtar, din jáne adam quqyqtary salasyndaǵy sarapshylar, quqyq qorǵaý baǵytyndaǵy túrli  úkimettik emes uıymdar men ortalyqtardyń ókilderi qatysty.