Aqtóbeniń turǵyndary qorymdy senimgerlik basqarýǵa berip qoıǵan atqarýshy bıliktiń áreketine ókpeli.  Jekeniń qolyna ótkeli jerleý qunynyń kólemi qymbattaǵany bylaı tursyn,  endi marqumdy jer qoınyna tapsyrý úshin  jurt áýeli sol mekemeniń ruqsatyn alýlary kerek eken. Áıtpese, jańa qojaıyn beıittiń mańyna da jýytpaıdy.  Aýyl turǵyndary zıratty jekege bergennen jaǵdaı jaqsaryp ketpegenin aıtyp otyr. Bul týraly Qamshy.kz aqparat agenttigi habarlaıdy.

Qala mańyndaǵy beıitterdi senimgerlik basqarýǵa bergende,  ákimdiktegiler  zırattardyń bárin birdeı baqylap, kútip ustaýǵa shamamyz kelmeıdi degen ýáj aıtqan edi. Keıin  jaýapkershilik qorymdardy jalǵa alǵan «Salttyq qyzmetterdiń biryńǵaı ortalyǵyna» júkteldi. Jalǵa alǵan mekeme Aqtóbeniń mańyndaǵy 50 zıratty kútip ustap, qoqysyn tazartyp, qorshaýdy óz mindetine aldy.  Alaıda, qalanyń irgesindegi Qýraıly aýylynyń turǵyndary aıtlyǵannyń bári qaǵaz júzinde qaldy dep, qyzmetine kóńili tolmaı otyr.

"Bul jóninde halyq qarsy. Eshteńe istep jatqan joq, qarashy, ana bizdiń bárin buzyp,  esikti myna jaqtan shyǵarǵan, vagonymyz anaý alqan talqan, shyǵaryp tastady, sısternanyń turysy anaý" – Qýraıly aýylynyń turǵyny Joldybaı İmbaǵambet.

Beıitten bıznes jasaǵandardy synaǵan halyq  jeke kompanıa jerleý úshin «ákesiniń qunyn surap otyr» dep shýlasqan edi. Artynsha arnaıy komısıa qurylyp, turǵyndardyń pikirin eskerdik dedi shendiler. Jalǵa alǵan tarap  5 myń, 10 myń, 20 myń teńge  qarjy kórsetilgen qyzmet úshin ǵana alynatynyn aıtqan edi. Biraq, jurttyń aıtqany buǵan múlde qaıshy kelip otyr.

"Bireýlerge kórsetilgen qyzmeti úshin túbirtek bergen, bireýlerge ony da bermeıtin kórinedi. Qyzmetine alyp jatqan aqshasy da túsiniksiz. Bir turǵynnan 85 myń alǵan, al myna tanysym  qudaǵıyn jerlegende 65 myń tóledik deıdi. Al bizdiń aýyldyń ákiminiń aıtqany, kelisim shartqa otyrǵanda 30  myń teńge degen baǵa týraly sóz boldy. Muny ákimdik baqylaýy kerek ǵoı" – Qýraıly aýylynyń turǵynyǵ bastamashy top ókili Feodor Grısenko.

Jeke kompanıa bolsa kelisim-shartta kórsetilgen mindetterdi atqaryp jatyrmyz dep, ózderine shań jýytpaı otyr.  Jerleýge berilgen aýmaqty jınastyryp,, qoqystardy shyǵaryp, qys ýaqytynda joldaryn tazartyp otyr eken. Aýyldyqtardyń beıit mańynan birde bir qyzmetkerin kózimiz shalmady degenderin de joqqa shyǵardy. Tipti, kún saıyn qyzmetkerlerimiz zırattarǵa reıd júrgizedi dep otyr. 

«Turǵyndarǵa  marqumdy jerlemes buryn bizge kelip tirkelý kerektigin eskertý úshin reıdter júrgizip jatyrmyz. Áıtpese,  kóbisi bul týraly habarsyz. Ol bizge keıin ortaq bazaǵa málimetterdi engizý úshin kerek.  Keıbireýler muny túsinistikpen qabyldasa, ekinshileri narazy bolyp jatady. Olardyń bárine túsindiremiz" – «Salttyq qyzmetterdiń biryńǵaı ortalyǵy» JSHS-nyń qyzmetkeri Svetlana Iýmasheva.

Senimgerlik basqarýǵa berilgen beıitterdiń máselesi oblys ákiminiń halyqqa esep berý kezinde de kóterildi. Berdibek Saparbaev bul tártipke keltirý úshin jasalǵan shara dep túsindirdi. Osydan eki jyl buryn Aqtbeniń mańynda birde bir zıratta qorshaý joq bolsa, senimgerlik basqarýǵa berý sol olqylyqtyń ornyn toltyrady dedi.