Soltústik Qazaqstan oblysynda kámeletke tolmaǵan úsh balasyn jalǵyz asyrap otyrǵan er azamat qulaǵaly turǵan úıdi panalap otyr.  Jaqsylyq Asqarovtyń tipti ol baspanaǵa  zańdy qujattary da joq eken.  Onyń máselesin jaqsy biletin Maǵjan Jumabaev aýdanynyń shendileri zańdy belden basyp jalǵyzbasty ákeni páter kezegine qoıa almaımyz deıdi. Qoıǵannyń ózinde bul otbasynyń qonys toıyn toılaýy ekitalaı. Aýdan ortalyǵynda on jyldan beri  kezekte turǵandarǵa birde- bir  páter berilmepti. Bul týraly KTK jańalyqtary habarlaıdy.

Jaqsylyq Asqarov pen Almagúl 12 jyl birge turǵan. Kelinshek 4 jyl buryn úsh balasyn tastap, ózge erkektiń etegin ustap kete barypty. Analary kenjeleriniń esinde joq, al es bilip qalǵan ereseginiń oǵan  degen  ókpesi qara qazandaı.

-Men ony jek kórip qaldym. Óıtkeni ol meni tastap ketti. Onyń qaıtyp kelgenin qalamaımyn, - dedi 7 synyp oqýshysy Gúlfaıra Asqarova.

Otaǵasy qazir 25 myń teńgege jaldanyp jumys isteıdi. Ózge jumysqa shyǵaıyn dese, kúnuzaq balalarǵa bas kóz bolatyn eshkim joq. Áıelin alımentke bergen eken, qaǵaz júzinde eseptelgen aqsha endi járdemaqy alýǵa kedergi bolyp tur. Bul otbasynyń qazirgi bar máselesi – baspana.

Asqarovtar otbasy bul úıge 7 jyl buryn qonystanǵan eken. Balalaryn mektepke berýge asyqqan olar úıdiń eski qujattaryna da nazar aýdarmaı, qolhatpen ǵana satyp alǵan. Endi apatty dep tanylǵan baspananyń qujattaryn retke keltirýge eski ıesiniń qulqy joq, al jańa ıesiniń aqshasy joq. 

Sondyqtan Jaqsylyq  jalǵyz baspanasy apatty dep tanylǵan jan retinde de  páter kezegine tura almaıdy. Al tepse temir úzetin azamattyń jalǵyzbasty áke retinde úı alýǵa  múmkindigi  joq eken.

Jaqsylyqtyń jaǵdaıyn aýdan shendirleri jaqsy biledi. Biraq zańdy belsheden basyp, ony baspana kezegine qoıa almaımyz deıdi.

-  Ol eshqandaı kategorıa boıynsha baspana kezegine tura almaıdy. Qujat boıynsha onyń moınynda eshqandaı baspana joq.  Jalǵyzbasty áke dep te tanylmaǵan. Onyń jubaıy analyq quqyǵynan aırylmaǵan. Osy túıtkilderdi rettegen soń ǵana biz ony úı kezegine qoıa alamyz, - Maǵjan Jumabaev aýdandyq TÚKSH bóliminiń basshysy Serik Qosanov.

Qujattaryn rettegenniń  ózinde bul otbasynyń  jýyq arada qonys toıyn toılaýy ekitalaı. On jyl buryn  aýdandyq ákimdikte túzilgen baspana kezegi osy jyldary birde-bir adamǵa ilgeri jyljymapty.