Redaksıamyzǵa baspanasynan aırylyp, ádildik izdep shyryldaǵan qyzylordalyq Beısengúl Alshynbaeva men zańger Qudaıbergen Jýantaev habarlasty. Qamshy.kz portaly erkin aqparat alańy bolǵandyqtan,  olardyń aıtqanyn qaz-qalpynda berip otyrmyz. Bul iske qatysty pikir bildirem deýshiler bolsa, saıt betinde jarıalaýǵa daıynbyz.

Qudaıbergen Jýantaev qyzylordalyq Beısengúl Alshynbaevanyń sot tarapynan ádiletsizdikke ushyrap, ózine tıesili múlkinen aırylyp qalǵanyn aıtady. Onyń sózinshe, qolynda quzyreti bar adamdar B. Alshynbaevanyń ańqaýlyǵyn paıdalanyp, páterin zańsyz ıemdenip alǵan eken.

- 1997 jyly Qyzylorda qalasy Tasbóget kenti Naýryz móltekaýdanyndaǵy burynǵy aýdandyq áskerı komısarıat ǵımaratyn ekige bólip, Tasbóget kentiniń ákimi S. Japbarhanovtyń (marqum) sheshimimen páterdiń bir bóligin B. Alshynbaevaǵa, ekinshi bóligin A. Qalıevqa bergen. B. Alshynbaeva – kóp balaly jáne múgedek kisi. Onyń 8 balasy bar. Sol jyldary páter ıeleriniń kooperatıvi, ıaǵnı PIK degen bolatyn. «Naýryz» PIK-iniń tóraıymy Saparkúl Tursynbaeva men Tasbóget kenti ákimdiginiń bas mamany Almash Taspanova ekeýi páterdiń jartysynan kóbin osy «Naýryz» PIK-ne ýaqytsha paıdalana turýǵa suraǵan. Al páterdiń qujattaryn S. Tursynbaeva rásimdep, zańdastyryp beretinin aıtqan. Araǵa shamamen 5-6 aı ýaqyt salyp S. Tursynbaeva páterdiń qujattaryn ákep bergen. Sóıtip ákimdik yńǵaıly oryn taýyp bergenshe «Naýryz» PIK-i B. Alshynbaevaǵa berilgen páterdiń jartysynan kóbin paıdalanatyn bolyp kelisedi. Al 3-4 jyldan keıin S. Tursynbaevadan: «Páterdi qashan bosatasyzdar?», - dep surasa, «Tura turyńyz, sizge keıin túsindiremin», - degen jaýappen B.Alshynbaevany shyǵaryp sala bergen. Al 2007 jyldyń aıaǵynda «Naýryz» PIK-i belgisiz sebeptermen páterden kóship ketken, - deıdi bul ispen aınalysyp júrgen zańger.

Al B. Alshynbaeva  «Naýryz» PIK-niń tóraıymy S. Tursynbaeva rásimdep bergen qujattarda ne jazylǵanyn túsinbegendikten, ony tekserip, ashyp qaramaǵan eken.

- 2008 jyly páterdiń syrtqy esiginiń ishinen kirpish órip bekitip, ishki bólmelerindegi eki esikti jańadan ornattym. Bólmelerdi áktep, syrlap qoıdym. 2016 jyldyń jaz aıynda kúrdeli jóndeý jumystaryn júrgizip jatqanymda Aınur degen kórshim «Naýryz» PIK-i paıdalanǵan bólmelerge qatysty sot bolǵanyn aıtty. Men ol týraly eshteńe bilmeıtinimdi aıtyp, dereý páter qujattaryn balama oqytsam, kezinde S. Tursynbaevanyń qujat rásimdegende maǵan tıesili páterdiń aýdanyn qasaqana kem kórsetkenin baıqadym», - deıdi Beısengúl Alshynbaeva.

Zańgerdiń aıtýynsha, S. Tursynbaeva óziniń qyzmettik babyn paıdalanyp, bóten múlikti ıelenip alý maqsatynda ýaqytsha paıdalana turýǵa bergen páterdiń jartysynan kóp bóligine 2007 jyldyń 11 qyrkúıeginde tehnıkalyq pasport jasatyp alǵan.

A. Taspanova qarjy polısıasyna bergen túsiniktemesinde: «Ákimniń sheshim shyǵaryp beremin degenine senip qalyp, S. Tursynbaevaǵa orderdi jazyp beremin dep qatelik jasaǵanymdy moıyndaımyn, keshirim suraımyn», - degen bolatyn. S. Tursynbaeva bul isti óz paıdasyna asyrý úshin A. Taspanovanyń  jazyp bergen, alaıda jaramsyz bolyp qalǵan orderin qoldanǵan eken.

- Bul isti zertteý barysynda 1997 jyly B. Alshynbaevaǵa páter berilgeni týraly Tasbóget kenti ákiminiń sheshimin A. Taspanova men S. Tursynbaevanyń ózderi qoldan jasap alǵanyn anyqtadyq. Arhıvti aqtarǵanymyzda ol páterdiń tek eki adamǵa ǵana berilgeni belgili boldy. Tasbóget kenti ákiminiń muraǵattan alynǵan sheshiminiń kóshirmesi qazaqsha áripteri bar mashınkada terilse, B. Tursynbaevanyń usynyp otyrǵan kóshirmesi qazaqsha áripteri joq mashınkada terilip, sońǵy jaǵy – Tasbóget kent ákiminiń qoly qoıylǵan tusy qurastyrylyp jasalǵan. Osylaı S. Tursynbaeva eki adamǵa berilgen páterdiń qujattaryn úsh adamǵa berilgen dep kórsetip, páterdiń kóp bóligin ózi ıemdenip alǵan», - deıdi zańger Qudaıbergen Jýantaev.

Qyzylorda oblystyq sotynan bastap QR Joǵarǵy sotyna deıin aryz jazǵan B. Alshynbaeva óziniń isi esh jerde durys qaralmaǵanyna shaǵymdanypty.

- Bul iske Qyzylorda oblystyq ishki ister departamentiniń asa mańyzdy ister jónindegi aǵa anyqtaýshysy, polısıa podpolkovnıgi Bolat Shajanbaevtyń tikeleı qatysy bar. 2016 jyldyń 31 qazanynan bastap oblys ákimi, oblys, qala prokýrory, oblystyq sot, onyń tómengi satysyndaǵy qalalyq sot jáne sottyń sýdıalary meniń aryzymdy qurdymǵa jiberip jatyr, - deıdi jábirlenýshi Alshynbaeva.

Zańgerdiń aıtýynsha, B. Shajanbaevtyń jubaıy Botagóz Tursynbaeva marqum anasy Sársenkúl Tursynbaevanyń zańsyz ıemdengen páterin «Zań boıynsha muraǵa quqyq týraly kýáliktiń» negizinde menshiktep alǵan eken.

Onyń sózinshe, polısıa polkovnıgi B. Shajanbaevtyń zańsyz is-áreketterin áshkerelep, oblys ákimi men oblys prokýroryna aryz jazǵan kezde quzyrly oryndar B. Alshynbaevanyń ózin aıypty dep taýyp, raqymshylyqpen keshirgen syńaı tanytypty.

– 2016 jyly 31 qazanda B. Shajanbaev pen B. Tursynbaeva meniń úıime basa-kóktep kirip, qyzymnyń basynan uryp qulatyp, sońynda ózimizdi kináli etip shyǵaryp, jaýapqa tartty. Oblys ortalyǵyndaǵy prokýratýra organdaryna birneshe ret aryzdansaq ta, sot organdarynyń aktilerine birneshe ret shaǵymdansaq ta, B. Shajanbaev pen B. Tursynbaevanyń áreketinde zańsyzdyq bary dáleldenip tursa da, bura tartýshylardyń kesirinen qyzym ekeýimiz jeńilis taýyp jatyrmyz. Zańsyz qujattardyń kúshin joıý týraly talabym áli kúnge deıin oryndalmady. Qyzylorda sotynyń zańsyz is-áreketterin qalaı toqtatýǵa bolady? - dep sharasyz kúrsinedi B. Alshynbaeva.