QR Prezıdenti Nursultan Nazarbaev Parlament palatalarynyń birlesken otyrysynda sóz sóıleý barysynda áleýmettik jańǵyrtýǵa baǵyttalǵan bes bastamany atap ótti. Besinshi bastama eldi gazben qamtamasyz etýdi jalǵastyrýǵa baǵyttalǵan.

QR Energetıka mınıstrliginiń Gaz ónerkásibin damytý departamentiniń dırektory Zıash Qıaqbaev Primeminister.kz-ke bergen eksklúzıvti suhbatynda tapsyrmalardy oryndaý barysy qalaı júrgiziletinin jáne jaqyn arada qandaı aımaqtar gazben qamtamasyz etiletinin aıtyp berdi.

— Memleket basshysy palatalardyń birlesken otyrysynda elimizdiń soltústik óńirin bir – bir jarym jyldyń ishinde gazdandyrý týraly tapsyrma berdi. Jobalardy iske asyrý qandaı satyda tur?

— Astanany, elimizdiń ortalyq jáne soltústik óńirlerin gazdandyrý maqsatynda gaz jáne gazben jabdyqtaý salasyndaǵy ulttyq operator «QazTransGaz» AQ «Saryarqa» magıstraldi gaz qubyrynyń qurylysy» jobasynyń TEN ázirledi. Oǵan «Memsaraptama» RMK oń tujyrym jasady.

Qazirgi tańda «QazTransGaz» AQ 2018 jyldyń maýsym aıynda memlekettik saraptamadan ótkizgennen keıin iske qosý josparlanǵan, jobalyq-smetalyq qujattamany ázirlep jatyr.

— Buǵan deıin Astana qalasyn gazdandyrý EQQDB-dan alynatyn qaryz qarajaty esebinen bastalatyny týraly habarlanǵan bolatyn. Jobany júzege asyrýdy bastaý úshin barlyq qajetti rásimder júrgizildi me?

— Búginde múddeli memlekettik organdar men uıymdardyń qatysýymen atalǵan jobanyń 1-kezeńin iske asyrýǵa qatysty máselelerdi pysyqtaýǵa baılanysty, sonyń ishinde EQQDB, EADB sekildi halyqaralyq qarjy ınstıtýttarynan, sonymen qatar QDB men basqa da kózderden qarajat tartý arqyly tıisti sharttar men qarjylandyrý sqemasy boıynsha jumys toby qurylýda.

Osy jyldyń maýsym aıyna deıin qarjylandyrý máselelerin sheshý jáne shilde aıynyń basynda magıstraldi gaz qubyrynyń alǵashqy torabyn dánekerleýdiń saltanatty rásimin ótkizý josparlanyp otyr.

— Gaz qubyryn salýdyń naqty merzimin atap ótseńiz?

— Gaz jáne gazben jabdyqtaý salasyndaǵy ulttyq operator «QazTransGaz» AQ aqparatyna sáıkes, jobany qarjylandyrý bastalǵannan keıin «Qyzylorda – Jezqazǵan – Qaraǵandy – Temirtaý – Astana» baǵyty boıynsha magıstraldi gaz qubyrynyń 1-kezeńi bir jyl ishinde júzege asyrylady dep kózdelgen.

— Jobanyń boljaldy quny qandaı?

— «Saryarqa» magıstraldi gaz qubyrynyń 1-kezeńiniń quny 267,3 mlrd teńgeni quraıdy.

— Gazdandyrý Astananyń ekologıasyna qalaı áser etedi?

— Jobany júzege asyrý jyl saıyn JES – 1,2,3 sý jylytatyn qazandarynda jaǵylatyn kómirdiń ornyn almastyrý arqyly Astana úshin áleýmettik-ekonomıkalyq jaǵynan paıdaly áserin tıgizedi. Qysqartýdyń yqpaly jylyna – 36,1 myń tonna lastaýshy zattar shyǵaryndylary (kúkirt dıoksıdi, kómirtek totyǵy, azot dıoksıdi, azot totyǵy, qatty bólshekter) bolady. Sondaı-aq, halyq kómirdiń ornyna tabıǵı gazdy paıdalanýdy jón sanaıdy dep esepteımiz, óıtkeni gazdy otyn retinde paıdalaný – eńbekti az talap etedi ári salystyrmaly túrde yńǵaıly.