Prezıdenttiń Baspasóz hatshysy Aıdos Úkibaı Nursultan Nazarbaevtyń aldaǵy jumys kestesi týraly aıtty dep habarlaıdy Qamshy.kz aqparat agenttigi Aqordanyń baspasóz qyzmetine silteme berip.

Memleket basshysynyń qatysýymen ótetin syrtqy saıası oqıǵalarǵa qatysty kóptegen saýaldardyń kelip túsýine baılanysty Prezıdenttiń Baspasóz hatshysy Aıdos Úkibaı Nursultan Nazarbaevtyń aldaǵy jumys kestesin jarıalady:
«Memleket basshysy bıylǵy 13 naýryzda Koreıa Respýblıkasy Ulttyq Assambleıasynyń Spıkeri Chon Se Gúnmen kezdesedi.
14 naýryzda Nursultan Nazarbaevtyń shaqyrýymen Tájikstan Respýblıkasynyń Prezıdenti Emomalı Rahmon Qazaqstanǵa resmı saparmen keledi. Sapar aıasynda memleketter basshylary kún tártibindegi ekijaqty, óńirlik jáne halyqaralyq ózekti máselelerdi talqylaıdy.

15 naýryzda Qazaqstan Prezıdenti Ortalyq Azıa elderi, sonyń ishinde Qazaqstan Respýblıkasy, Qyrǵyz Respýblıkasy, Tájikstan Respýblıkasy, Túrikmenstan jáne Ózbekstan Respýblıkasy basshylarynyń jumys (konsýltatıvtik) kezdesýine qatysady. Bul bes jaqty kelissózderdiń Ortalyq Azıanyń barlyq eli úshin ortaq mereke – Naýryz meıramy qarsańynda ótýiniń mańyzy zor.

Túrikmenstanda joǵary deńgeıdegi is-sharalardyń aldyn ala josparlanýyna baılanysty bul elden Medjlıs tóraıymy A.T.Nýrberdyeva hanym qatysady.
Sol kúni N.Nazarbaev pen Sh.Mırzıóevtiń qatysýymen Qazaqstandaǵy Ózbekstan jylynyń saltanatty ashylý rásimi ótedi. Sondaı-aq, eki el kóshbasshylary óner qaıratkerleriniń gala-konsertine qatysady.
16 naýryzda Memleket basshysy Sırıa jónindegi Astana prosesine kepil bolatyn mınıstrlik deńgeıindegi birinshi kezdesýge qatysýshylar – Reseı, Túrkıa jáne Iran syrtqy ister mınıstrlerimen júzdesedi».