Pavlodarda № 29 mekteptiń 2-synyp oqýshysy Halıda Áýbákirovany mektepke basyna aq tústi oramal tartyp barǵany úshin sabaqqa kirgizbeı qoıdy dep habarlaıdy Qamshy.kz aqparat agenttigi azattyq.org saıtynyń deregin negizge ala otyryp. Oqýshynyń ákesi Erqanat Áýbákirov prokýratýraǵa shaǵymdanyp, qyzynyń bilim alýyna «zaıyrly aq tústi oramal tartqany úshin» kedergi keltirmeýdi surady.

Áýbákirovtiń aıtýynsha, qyzyn oramal tartqany úshin 9 naýryz kúni de sabaqqa kirgizbeı qoıǵan. Munyń aldynda qyzy sabaqqa oramalmen baryp júrgen. «Qazaqstandyq mádenıetpen tárbıelengen qyzym óz yntasymen kádimgi juqa aq tústi oramal tartady. Buǵan baılanysty kez-kelgen ósek-aıań, kemsitý onyń jan-dúnmesine keri áser etip, psıhologıalyq soqqy bolyp tıedi», — delingen Erqanat Áýbákirovtiń prokýratýraǵa jazǵan shaǵymynda.

№ 29 mektep dırektory Vladıslav Elenıch oqýshynyń sabaqqa kirgizilmegenin rastady. Ol oqýshy mektep formasyna qoıylatyn talapty buzǵandyqtan kirgizilmegenin aıtty. Elenıch mektepte bir ǵana qyz oramal tartatynyn jáne onyń ata-anasyna mektepte oramal tartýǵa bolmaıtyny týraly birneshe ret eskertilgenin aıtady.

— Olardyń mektepke oramal taǵyp kelýine baılanysty bilim salasyndaǵy qadaǵalaý departamentimen sóılestik. Ata-anasy ákimshilik jaýapqa tartylyp, eskertý jasaldy, olardy kámeletke tolmaǵandar isi boıynsha komısıaǵa shaqyrdyq. Biraq ol otbasy oǵan qyńq demeıdi jáne balalaryn óz qalaýy boıynsha kıindirýge quqyǵymyz bar dep oılaıdy, - dedi Vladıslav Elenıch.

Dırektor sonymen qatar ata-ananyń bilim jáne ǵylym mınıstriniń mektep formasyna qoıylatyn talap týraly 2016 jyly 26 qańtarda shyǵarǵan № 26 buıryǵyn buzyp otyrǵanyn da aıtady.

Toǵyz jastaǵy Halıda Áýbákirova birinshi synyptan beri oramal taǵady. Ákesiniń aıtýynsha, otbasynda áıeli men qyzdary túgel oramal tartady.