Úkimettiń búgingi otyrysynda Ulttyq banktiń tóraǵasy Danıar Aqyshev "7-20-25" baǵdarlamasynyń jobasyn tanystyrdy, dep habarlaıdy QazAqparat-qa silteme berip Qamshy.kz aqparat agenttigi.

Bas bankırdiń aıtýynsha, 7 prosenttik ıpotekamen aınalysatyn arnaıy kompanıanyń kapıtaly Ulttyq banktiń esebinen qalyptasady. Kompanıa ol aqshaǵa ekinshi deńgeıli bankter bergen jańa ıpotekalyq nesıelerdi satyp alady.

 "Jańa baǵdarlama árkimge jeńildik sharttaryn beredi. Alaıda baǵdarlama masyldyqqa jol bermeýge tıis. Baǵdarlama qaryz alýshynyń tólemge qabiletti bolýyn talap etedi. Oǵan resmı kirisi bar Qazaqstan azamattary qatysa alady. Qazir banktermen jańa baǵdarlamanyń sharttary pysyqtalýda. Mysaly, úıdiń baǵasy 7 mıllıon teńge bolsa, aı saıynǵy tólem 50 myń teńgeden aspaıdy. Bul jalpy alǵanda jumys isteıtin Qazaqstan azamattarynyń kópshiligi úshin qolaıly", - dedi D.Aqyshev.

Onyń sózine qaraǵanda, búginde respýblıka boıynsha turǵyn úıdiń baǵasy ár alýan. Sondyqtan iri qalalar men aımaqtar boıynsha baspana baǵasyna dıferensıasıa jasalýy múmkin.

 "Baǵdarlamanyń qazirgi ólshemderi ázirshe joba ekenin eskerý kerek. Bunyń barlyǵy áli memlekettik organdar men banktermen talqylanady. Sondaı-aq, jergilikti atqarýshy organdarynyń pikirin estýimiz kerek", - dep atap kórsetti D.Aqyshev.