Memleket basshysy Koreıa Respýblıkasy Ulttyq Assambleıasynyń spıkeri Chon Se Gúnmen kezdesti, dep habarlaıdy Qamshy.kz aqparat agenttigi Aqordanyń baspasóz qyzmetine silteme jasap.

Nursultan Nazarbaev kezdesý barysynda Qazaqstan men Ońtústik Koreıa arasyndaǵy saýda-ekonomıkalyq qarym-qatynastyń damyp kele jatqanyn jáne ony ári qaraı nyǵaıtýǵa múddeli ekenin atap ótti.

– Qazaqstan Koreıa Respýblıkasymen jaqsy qarym-qatynas ornatqan. Elderimiz arasyndaǵy taýar aınalymynyń kólemi eki mıllıard dollarǵa jýyqtady. Sizderdiń taýarlaryńyzdyń bizdiń elge Lánúngan porty arqyly kelip jatqany qýantady, onda bizdiń logıstıkalyq termınalymyz bar. Qazaqstan Koreıamen jańa jáne sıfrlyq tehnologıa, ındýstrıalandyrý, medısına jáne basqa da salalarda yntymaqtastyq ornatýǵa nıetti, – dedi Qazaqstan Prezıdenti.

Sonymen qatar Memleket basshysy Qazaqstan men Ońtústik Koreıa arasyndaǵy parlamentaralyq qarym-qatynastardy nyǵaıtýdyń jáne olardy damytýdyń mańyzdylyǵyna nazar aýdardy.

Chon Se Gún kezdesýge jáne ekijaqty qatynastar máselesin talqylaýǵa múmkindik bergeni úshin Nursultan Nazarbaevqa alǵys bildirdi.

Ulttyq Assambleıa spıkeri Astananyń qarqyndy damyp kele jatqanyn aıtyp, Qazaqstanda ótken jahandyq is-sharalar – Halyqaralyq «EKSPO-2017» mamandandyrylǵan kórmesi men Dúnıejúzilik XXVIII qysqy ýnıversıadaǵa joǵary baǵa berdi.

Chon Se Gún ekijaqty baılanystyń strategıalyq sıpatta damyp kele jatqanyna toqtalyp, «Qazaqstan-2050» strategıasynyń maqsattaryna jetý jolynda Koreıa Qazaqstanǵa seriktes bolýǵa daıyn ekenin atap ótti.

Budan bólek, Ulttyq Assambleıa spıkeri ótken ǵasyrdyń 30-jyldarynda Qazaqstanǵa jer aýdarylǵan etnıkalyq káristerge kómek qolyn sozyp, qoldaý kórsetkeni úshin elimizdiń halqyna alǵys bildirdi.

Sonymen qatar Chon Se Gún Qazaqstan Respýblıkasy Parlamenti Májilisiniń spıkeri N.Nyǵmatýlınmen kezdesip, eki el parlamentteri arasyndaǵy yntymaqtastyq týraly kelisimge qol qoıylǵanyn aıtty.