Osydan segiz jyl buryn Aqtaý qalasyndaǵy qatań tártiptegi kolonıadan 60-tan astam tutqyn qashýǵa áreket jasady. Sol kezde qaraýylda turǵan 19 jastaǵy Erbol Otarbaev jalǵyz ózi 40 qashqynnyń jolyn bógegen bolatyn.
Osy oqıǵanyń jelisimen qazaqstandyq «AIÝ SINEMA» kınokompanıasy «Habar» agenttigi jáne QR Ulttyq ulannyń qoldaýymen «Altynshy beket» atty kórkem fılm túsirdi.
Búgin fılmniń jabyq kórsetilimi ótti. Drama janrynda túsirilgen kınotýyndy Erbol Otarbaevtyń erligi tóńireginde órbıdi.
Erbol Otarbaevty akter Sanurjan Súleımenov somdady. Jaýyngerlik qyzmet atqarý kezinde kórsetken erligi men qaısarlyǵy úshin İİİ dárejeli «Aıbyn» ordenimen nagradtalǵan Erbol Otarbaevtyń ózi túsirilim kezinde Sanurjanǵa obrazǵa kirýine kómek kórsetip, keńes bergen.
15 naýryzdan bastap kórermenge jol tartatyn «Altynshy beket» kórkem fılmi dostyq pen mahabbat, qaısarlyq pen satqyndyqty, jat aǵymnyń tarapynan tóngen qaýip pen túrme ómirin sýretteıdi.
Kınokartınanyń prodúseri - kınematografıst Danıar Ibragımov. Fılm rejıseri – Cerikbol Ótepbergenov. Bul onyń rejıser retinde túsirgen alǵashqy iri jumystarynyń biri boldy. Sonymen qatar Serikbol Ótepbergenov fılmde túrme qyzmetkeriniń rólin somdaıdy.
«Altynshy beket» kórkem fılmindegi akterlik quramnyń 80 paıyzy – naǵyz áskerı qyzmetshiler, Ulttyq ulan qatarynda qyzmet etetin jaýyngerler. Atalmysh fılm arqyly áskerı qyzmetkerler ózderin akterlik qyrynan da kórsete bildi. Fılmde Ulttyq ulannyń áskerı tehnıkasy qoldanyldy.
Akterler obrazǵa ený úshin jalǵyz adamǵa arnalǵan kamerada otyrǵan.
Basty keıipker Sanurjan Súleımenov kolonıadaǵy kazarmada birneshe kún turyp, sarbazdarmen birge jattyǵýlarǵa qatysqan. Ekinshi bas keıipker Jasulan Ómirbek qatań tártiptegi kolonıanyń baqylaýshylarymen birneshe kún jumys istedi.
Jabyq kórsetilimnen keıin ótken baspasóz konferensıasynda sóz alǵan prodúseri Danıar Ibragımov fılmdi túsirýdegi maqsatyn aıtyp berdi.
-«Altynshy beket» shynaıy oqıǵalarǵa negizdelgen fılm. El tynyshtyǵyn kúzetkenderdiń erligi jaıynda shaǵyn orta ǵana biledi. Biz fılm arqyly bul jaǵdaıdy ózgerkimiz keldi, - dedi prodúser.
