Alaqanǵa jel tıgendeı jep-jeńil,
Shýmaq-shýmaq jyr jelpindi mende bir.
Baıtaq Eldiń batysynda kórisý 
Batysynda meıram kóńil, keń kóńil.

Hazar teńiz kúngeıinen jel esip,
Jyly maýsym, baıaý jyljyp kelesiń.
Merekeniń bógenaıy bólekshe,
Eske salar erteginiń elesin.

Mańǵystaýda – amal - kóktem - kórisý,
Saqtaǵanyn, 
as-taǵamyn bólisý.
Qymbatynyń kóz aldynan tabylý,
Renishten, arazdyqtan arylý.
Jón-josynmen, esik ashý – sabylý.
Alystaǵy aǵaıyndy saǵyný.

Azamaty ańyz tyńdap atadan,
Ul-qyzdary úmit alyp batadan.
Qazaqtyǵyn, azattyǵyn ulyqtap,
Abyzdaryn «áýlıe» dep ataǵan.

Kelin bitken hanshaıymdaı kıinip,
Tizilip kep sálem salar ıilip,
Aqyn otyr jarasymǵa súıinip,
Abyz otyr jaratqanǵa syıynyp.

Kúı estiler sher qaladan shermende,
Ot elester Otpan taýǵa kelgende.
«Máńgi seniń mekeniń» dep tas shaýyp,
Máńgi belgi qaldyratyn ólgende.
Myń jyldyǵyn tanytady dalasy,
Maıly qıan Mańǵystaýdy kórgenge.

Tamashalap sý betinen jel izin,
Urttap súıip aqqý qonǵan teńizin,
Mańǵystaýǵa jetkize gór, óleńim,
Shyǵystaǵy bir aqynnyń lebizin.