Bala quqyqtary jónindegi ýákil, depýtat Zaǵıpa Balıeva Saryaǵashtaǵy zorlyqtyń qurbany bolýy múmkin mektep oqýshysymen kezdesti, dep jazady Qamshy.kz aqparat agenttigi. Kezdesýden soń depýtat balanyń jaǵdaıy týraly jýrnalıserge bergen suhbatynda aıtyp berdi.

Balıevanyń aıtýynsha, balanyń quqyqtary men qaýipsizdigin qamtamasyz etý úshin oǵan túrli suraqtar qoıýǵa tyıym salý týraly sheshim qabyldanǵan.

-Tipti balaǵa men de eshqandaı suraq qoıa almaımyn. Meniń mindetim – balanyń qaýipsizdigin qamtamasyz etý. Qazirgi ýaqytta onyń janynda jaqyndary men psıholog bar. Tergeýshiniń nusqaýy boıynsha, balanyń kózinshe zorlyq týraly áńgime bolmaýy tıis. Bala tynyǵý qajet. Jaǵdaıy jaqsy, kóńildi júr. Menińshe, taǵy eki-úsh kún kúte turý kerek», - dedi Balıeva.

Sondaı-aq depýtat balanyń anasy tabylǵanyn ári onymen sóılese alǵanyn aıtty.

-Bala qaýipsiz jerde. Ájesi men tátesi janynda, men de barmyn.   Anasyn taýyp, sóılestim. Olar erteń menimen Astanaǵa ushady. Balanyń tynyǵýy úshin jaıly jaǵdaı jasaý qajet. Sebebi alda bolatyn saraptamalar  balany kúızeliske ushyratýy múmkin. Memlekettik organ ókilderi dárigerler, psıhıatrlar jáne pedıatrlardy qamtamasyz etýge daıyn», - dedi ol.

Zaǵıpa Balıeva balamen kezdesý úshin Shymkentke 14 naýryzda túngi ýaqytta barǵan.

Aıta keteıik, «OQO-daǵy Saryaǵash aýdany Abaı aýylynyń jeti jastaǵy turǵyny zorlyqtyń qurbany boldy» degen habar áleýmettik jelige keń tarap, jergilikti BAQ-tyń nazaryna ilinip, áleýmettiń ashý-yzasyn týdyryp, qatty talqylaýǵa ulasqan. 14 naýryz kúni Batyrbekova men jıenin polısıa ustaǵany habarlanǵan. Jergilikti qoǵam belsendisi Dinmuhamed Artyqovtyń aıtýynsha, Batyrbekova men onyń jıenin sársenbi keshki saǵat 20.00 shamasynda Shymkent vokzalynan Almatyǵa júreıin dep turǵan jerinen jıyrma shaqty polıseı kúshtep alyp ketken bolatyn.