Qyrǵyzstan úkimeti «Aqyldy qala» ınvestısıalyq jobasynan bas tartyp, muny óz kúshterimen júzege asyrýǵa nıetti ekenin málimdedi.

«Investorlar aldyn ala kelisimge sáıkes, qujattardy merziminen kesh ári sapasyz daıyndaǵan», - dep habarlaıdy úkimettiń baspasóz qyzmeti.

Ondaǵy málimetke sáıkes, daıyndyq jumysy kezinde ınvestorlar qyrǵyz úkimetiniń tehnıkalyq talaptaryn oryndamaǵan. Sonymen birge taraptar birqatar tehnıkalyq suraqtar boıynsha ortaq sheshimge kele almaǵan.

«Qazirgi kezde qyrǵyz úkimeti óz kúshimen, halyqaralyq donorlardyń jáne bıznes-sektorlardyń qoldaýymen «Aqyldy qala» jobasyn júzege asyrýǵa tyrysyp jatyr», - delingen habarlamada.

2018 jyldyń 11 qańtarynda Qyrǵyzstan Qytaıdyń Huawei Technologies kompanıasymen «Aqyldy qala» jobasy boıynsha kelisimge kelgen. Jalpy quny 60 mln dollarǵa eldiń eki iri qalasyndaǵy tas joldarǵa tolyǵymen vıdeo baqylaý júıesi ornatylý kerek bolǵan.