Qazaqstan Respýblıkasynyń Ulttyq ekonomıka mınıstrligi Dúnıejúzilik bank tobymen birlesip «Doing business» sýbulttyq baıandamasynyń tanystyrylymyn ótkizdi, dep habarlaıdy Qamshy.kz aqparat agenttigi QR Ulttyq ekonomıka mınıstrliginiń baspasó qyzmetine siltme jasap.
Tanystyrylym jumysyna Dúnıejúzilik bank sarapshylary, kásipkerlikti damytý salasyndaǵy qazaqstandyq sarapshylar, ortalyq jáne jergilikti memlekettik organdardyń ókilderi, sondaı-aq bıznes-qoǵamdastyq qatysty.
İs-shara barysynda el óńirlerindegi jáne qalalardaǵy kásipkerlik qyzmetti retteý jáne júrgizilgen reformalardy taldaý nátıjeleri tanystyryldy.
Qazaqstandaǵy «Doing business» sýbulttyq reıtıńi baıandamasynda tórt kórsetkish: kásiporyn ashý, qurylysqa ruqsat alý, elektrmen jabdyqtaý júıesine qosylý jáne menshikti tirkeý boıynsha salystyrmaly taldaý jasalǵan.
Ulttyq ekonomıka vıse-mınıstri Aıbatyr Jumaǵulovtyń aıtýynsha, 2017 jyly Qazaqstannyń 2 qalasy men 6 óńirinde (Astana, Almaty, Aqtóbe, Qaraǵandy, Qostanaı, Óskemen, Pavlodar, Shymkent) zertteý jasalǵan.
Elimizdiń árbir óńirindegi iskerlik ahýaldy keshendi zertteý boıynsha jumystardy jalǵastyrý maqsatynda Úkimet «Doing business» sýbulttyq reıtıńin ótkizý tájirıbesin taratýǵa sheshim qabyldady. Sýbulttyq reıtıń nátıjesi boıynsha úzdik tájirıbe Qazaqstannyń qalǵan óńirlerinde paıdalanylatyn bolady.
UEM vıse-mınıstriniń aıtýynsha, Qazaqstan óz aldyna damyǵan elderdiń úzdik 30-dyǵyna ený sekildi órshil maqsat qoıyp otyr. Atalǵan maqsatqa jetý úshin bıznesti qaıta retteý boıynsha josparly saıasat júrgizilip, ruqsat berý júıesi jetildirilýde, memlekettik organdardyń baqylaý-qadaǵalaý qyzmeti ońtaılandyrylyp, bıznes-klımat jaqsartylýda. Qabyldanǵan sharalardyń nátıjesinde Qazaqstan 2017 jyldyń qorytyndysy boıynsha Dúnıejúzilik banktiń «Doing business» reıtıńindegi 36 oryndy ıelendi.
«Bizge Dúnıejúzilik bankpen birlesip, elimizdegi árbir óńir men qalada jergilikti deńgeıde is júzinde júrgizilgen reformalardyń júzege asyrylýyn táýelsiz baǵalaý qajet», - dedi vıse-mınıstr.
İs-sharanyń qorytyndysyn túıindeı kelip, vıse-mınıstr Aıbatyr Jumaǵulov atalǵan jumystardyń jekelegen árbir óńirdegi iskerlik ahýaldy edáýir jaqsartýǵa múmkindik beretindigin atap kórsetti. Ol jergilikti atqarýshy organdardy «Doing business» sýbulttyq reıtıńi jobasyn júzege asyrýǵa belsendi qatysýǵa shaqyrdy.
