«Jas Otan» jastar arasynda «Elbasynyń 5 bastamasy» taqyrybynda respýblıkalyq vıdeo-baıqaý jarıalaıdy.
Jaqynda QR Parlamenti palatalarynyń otyrysynda Elbasy 5 áleýmettik bastama kóterdi. Qazaqstandyqtardyń áleýmettik jaǵdaıyn jaqsartýǵa arnalǵan mańyzdy bastamalardy halyq arasynda, ásirese jastarǵa túsindirý mańyzdy.
Baıqaý 14 naýryz-4 mamyr aralyǵynda ótedi, jeńimpazdar áleýmettik jelide qoldaý tapqan úzdik 10 jumystyń ishinen arnaıy qazylar alqasymen anyqtalady. Vıdeolar MP4, MPEG, AVI sıfrlyq formatynda 1-5 mınýt hronometrajda qabyldanady. Baıqaýǵa 16 jasqa tolǵan kez kelgen qazaqstandyq qatysa alady.
Nátıjesinde jeńimpazdarǵa baǵaly syılyqtar tabystalady (Canon 7d Mark fotokamerasy, BestableCam Horizon H6 elektrondy stedıkam, DJI Osmo kamerasy, GoPRo HERO5 4K ekshn-kamerasy).
Baıqaý arqyly jastar uıymy jas azamattar arasynan saıasatqa degen erekshe, kreatıvti kózqarasty baıqap qana qoımaı, memlekettik saıasat pen reformalar týraly oılaryn bilip, ózderiniń azamattyq ustanymyn bildirýge yntalandyrýdy kózdeıdi.
Danıar Súndetbaev, «Jas Otan» Jastar qanatynyń Tóraǵasy:
«Baıqaýdy uıymdastyrý arqyly qoǵamnyń Elbasymyz usynǵan 5 áleýmettik bastamasymen tanysýǵa, turǵyn úı máselesindegi jeńildikterdi, bilim alý salasyndaǵy múmkindikterdi, salyq tóleý erekshelikteri, shaǵyn jáne orta bıznestegi qyr syrlarmen tanysýǵa múmkindik beremiz. Jastardyń qyzyǵýshylyqtary ár túrli. Biz úshin ár bastamany ózimizdiń elegimizden ótkizip, jastar tilinde túsindirý ońaıyraq. Sondaı-aq, baıqaý jas talanttardyń shyǵarmashylyq potensıalyn arttyryp qana qoımaı, básekelestikke, saıysqa túsýge úıretedi, jas talanttardy halyqqa tanystyramyz. Vıdeo salasyn bolashaq kásibi retinde kóretin jastarǵa baǵaly tehnıka syılaý arqyly olardyń óz kásibin jetildirýlerine jol ashamyz. Al biz tańdaǵan taqyryp qoǵamdaǵy áleýmettik jaýapkershilikti arttyrýǵa kómektesedi».
Úzdik jumystardy anyqtaıtyn arnaıy qurylǵan ádil qazylar quramynda telejúrgizýshi, jýrnalıs Asqat Sadyrbaı, tanymal vaıner, akterler Aqsultan Qalıev jáne Ǵanı Ajıkenov bar.
Sondaı-aq, búginnen bastap elimizdiń birqatar oblystarynda Kórisý kúni toılanady.
