Ońtústik Qazaqstan oblysynda zorlandy delingen 7 jasar balanyń anasy tabylyp, Astanaǵa keldi dep jazady Qamshy.kz aqparat agenttigi. Biraq kelinshekke quqyq qorǵaýshylar óz ulyn biraz ýaqyt kórsetpeı qoıǵan. Bul týraly onyń advokaty Baýyrjan Azanov áleýmettik jeli arqyly joldaǵan vıdeoúndeýinde aıtty.
«Balanyń anasy dál qazir meniń janymda. Ol anasy men ápkesine bergen senimxattyń kúshin joıdy. Sonda da bizdi balaǵa jolatpaı otyr. Anasy quqyq qorǵaý organdarynan túsiniksiz jaǵdaıǵa jaýap berýin surady. Bizge balany bermeı otyrǵandardyń naqty kim ekeni belgisiz.Olarǵa bir emes birneshe suraq qoıdyq, alaıda jaýap ala almaı otyrmyz. Biz polıseıler men prokýrorlardy shaqyrdyq», — dedi zańger Azanov.
Araǵa biraz ýaqyt salyp ana men bala aqyry qaýyshty. Osy istiń basy-qasynda júrgen Arýjan Saıyn óziniń Facebook paraqshasynda jazǵandaı, iske Bas prokýratýranyń ókilderi aralasqannan keıin ǵana áıelge óz ulyn qaıtaryp bergen.
