QR Din isteri jáne azamattyq qoǵam mınıstri Nurlan Ermekbaev úkimettik emes uıymdardy pallıatıvtik kómek kórsetý jáne hospıster júıesin damytýǵa shaqyrdy. Bul týraly mınıstr QR Din isteri jáne azamattyq qoǵam mınıstrligi janyndaǵy úkimettik emes uıymdarmen ózara is-qımyl jónindegi Úılestirý keńesiniń kezekti otyrysynda málimdedi.

Nurlan Ermekbaev VII Azamattyq forýmnyń usynymdaryn oryndaý sheńberinde memlekettik organdardyń ÚEU-men ózara is-qımyl jasaýy túrli salalarda keń aýqymdy máselelerdi qamtıtynyn atap ótti.

«Bul rette, biz halyqty alańdatatyn ózekti máselelerge monıtorıń júrgizip otyramyz jáne bizge túrli ótinishter kelip túsedi. Turǵyndardyń kópshiligi úkimettik emes uıymdardy pallıatıvtik kómek kórsetý jáne hospıster júıesiniń damytýǵa belsendi qatysýy jóninide tilek bildiredi. Bul birinshi kezekte onkologıalyq naýqastarǵa, qart adamdarǵa qatysty kómek», - dep atap ótti Nurlan Ermekbaev.

Mınıstrdiń aıtýynsha, búgingi kúni ýákiletti memlekettik organ elimizde tıisti jumystardy júrgizedi, atap aıtqanda pallıatıvtik medısınalyq  kómek kórsetýdi damytý boıynsha qysqa merzimdi jol kartasyn ázirlegen.

Bul oraıda, mınıstr memlekettik organdardy pallıatıvtik kómek kórsetý, óńirlerdegi hospıster jumysyn damytý úshin úkimettik emes uıymdardyń áleýetin paıdalanýǵa nazar aýdartty.

Esterińizge sala keteıik, úkimettik emes uıymdarmen ózara is-qımyl jónindegi Úılestirý keńesine qatysýshylar VII Azamattyq forýmynyń usynymdaryn júzege asyrý, sondaı-aq úkimettik emes uıymdardyń jáne qoǵamnyń sybaılas jemqorlyqqa qarsy mádenıetti qalyptastyrýdaǵy belsendiligin talqylaǵan bolatyn.