Til kúreskeri Rýza Beısenbaıtegi redaksıamyzǵa habarlasyp, Pavlodardaǵy №111 qoǵamdyq kóliginde bolǵan oqıǵany aıtyp berdi.

— Júrgizýshi avtobýsqa kirgen bette: «Oplatıte  proezd», - dep aıtty. Men: «Qazaqsha aıtyńyz, memlekettik tildi eshkim alyp tastaǵan joq dedim», - deıdi Pavlodar turǵyny.

Júrgizýshi bolsa orys tilinde sóılep, qaıtadan jolaqysyn tóleýin suraǵan.

Al Rýza Beısenbaıtegi kondýktor qazaqsha sóılemese, jolaqysyn tólemeıtinin aıtqan.

Avtobýstaǵy jolaýshylar sol sátte qazaqsha sóıleýdi talap etken turǵynǵa jabyla ketken kórinedi.

— Jolaýshylar arasynda ornyma jolaqysyn tóleýdi usynǵandar da boldy. Men aqshamdy aıap turǵan joqpyn, memlekettik tildiń qoǵamdyq oryndarda saqtalýyn talap etip otyrmyn, - deıdi Rýza Beısenbaıtegi. 

Ýaqyt ozdyrmaı Rýza Beısenbaıtegi oblys ákimdigine habarlasqan. Ol jerdegiler til kúreskeriniń  daýysyn estigen soń tutqany qoıa salǵan. Sodan keıin qala ákimdigine telefon soqqan til janashyry: «Eger ákimdiktegiler nemese polısıa qyzmetkerleri  aıaldamada aldymnan shyqpasa, avtobýstyń astyna tússem de, ony toqtatamyn», - degen.

Avtobýs aıaldamaǵa toqtaǵan kezde Rýza Beısenbaıtegi onyń aldyna shyǵyp, jolyn bógegen. Júrgizýshi til kúreskerin qorqytpaq bolyp, kóliktiń tumsyǵymen keýdesinen aqyryn ıteripti. Rýza apaı onysyn eleń qylmaı, shyntaǵyn tirep turyp alǵan. 5 mınýttan soń polısıa qyzmetkerleri kelip, eki jaqqa da túsinikteme jazdyrǵan. Nátıjesinde, avtobýs júrgizýshisi Rýza Beısenbaıteginen orys tilinde keshirim surapty. 

— Men júrgizýshige aıttym: «Men sizdi keshiremin. Biraq eki shartym bar: birinshiden, keshirimdi memlekettik tilde suraýyńyz kerek; ekinshiden, kelesi joly qoǵamdyq kólikte qazaq tilinde qyzmet kórsetińiz», - dedim. Júrgizýshi bul talabymdy jaýapsyz qaldyryp, teris burylyp ketti, - deıdi Rýza Beısenbaıtegi.