16 naýryzda Almaty oblysy Eńbekshiqazaq aýdany Qarakemer eldi mekeninde, Qazaqstan Respýblıkasy Ulttyq ulany 6654 áskerı bóliminiń bazasynda kınolog-mamandardy esirtki tabý aıasynda ótkizilgen biliktilikti joǵarylatý (qaıta daıarlaý) kýrstarynyń jabylý saltanaty ótti, dep jazady Qamshy.kz aqparat agenttigi.
Shara aıasynda atalǵan oqý kýrsyn oqyǵany týraly sertıfıkatqa Ulttyq ulannyń bes kınolog-mamany ıe boldy.
Ulttyq ulanda esirtki izdeýshi ıisshil ıtterdi qoldaný saraptamasy oń kórsetkishterge bastaıtyndyǵy baıqalǵan. Osylaısha, ótken jyly elimizdiń ár túrli óńirinde esirtki zattaryn tárkileý boıynsha 56 derek tirkeldi. Naqtylaı tússek, marıhýana, geroın, gashısh sıaqty 103 keli esirtki zaty tabylyp, tárkilengen. Bul osy kúnderi kınologtar qyzmettik-jaýyngerlik tapsyrmalardy oryndaýda ıisshil ıtterdi sátti qoldanyp kele jatqanyn kórsetedi.
Al ıtterdi daıyndaý Qarakemer kentinde ornalasqan Ulttyq ulannyń kınologıalyq ortalyǵynda júzege asyrylýda. Iisshil ıtter izdeý, patrúldik-izdeý, qaraýyldyq qyzmet pen esirtki jáne jarylǵysh zattardy izdeý, shabýyldaý men áskerı-jaýyngerlik jattyǵýlarda qoldaný maqsatynda daıarlanady. Taǵy bir aıta keterligi, osy kezge deıin mundaı baǵyttaǵy jattyǵýlar Túrkıa men Avstralıada uıymdastyrylǵan bolatyn.
Bul joly Ulttyq ulan kınologtary úshin tájirıbelik kómekti amerıkalyq áriptester kórsetti. Sertıfıkattardy tapsyrý saltanatyna esirtkimen kúres boıynsha baǵdarlamanyń menedjeri maıor Krıstofer Kent, AQSH-tyń Almaty qalasyndaǵy bas konsýly Mark Mýdı men kınolog-nusqaýshy Brús Gýdeıl jáne Skott Zaıtner qatysty.
Jıynda sóz alǵan Krıstofer Kent esirtkimen kúres Qazaqstanda ǵana emes, álemdik qaýymdastyq úshin de kún tártibinen túspeıtin másele bolyp tabylatynyn aıtty. «Osyndaı kýrstardy ótkizý arqyly biz tájirıbe almasyp, biliktiligimizdi shyńdaımyz. Bul baǵytta qazaqstandyq áriptesterimiz bizdiń senimdi seriktesimiz bolyp tabylady. Sondyqtan da álemdik qaýipsizdikti kózdeıtin osyndaı nátıjeli yqpaldastyǵymyz odan ári jalǵasa túsedi dep oılaımyn», dedi.
Óz kezeginde Ulttyq ulan basshylyǵy AQSH elshiliginiń áskerı yqpaldastyq pen qaýipsizdik bólimi kelisim aıasynda esirtkilerdi tabý sheberligin shańdaý kýrstary alǵash ret uıymdastyrylyp jatqanyn tilge tıek etti. «Oqytýdy Amerıkadan kelgen joǵary bilikti mamandar ótkizdi. Ulttyq ulan kınologtary kýrs barysynda jaqsy nátıjeler kórsetti. Bul tájirıbe olardyń esirtki bıznesimen kúres boıynsha áskerı – jaýyngerlik tapsyrmalardy sheshýde sátti qoldanylatyn bolady», dedi Ulttyq ulannyń jaýyngerlik qyzmet bas basqarmasynyń bastyǵy polkovnık Baatr Bambýkov.
Sonymen qatar, Ulttyq ulan kınologtaryn AQSH-tyń kontrabandamen kúres boıynsha tájirıbeli mamandary úıretti.
Amerıkalyqtar saqyldaǵan sary aıaz ben 40-gradýstyq ystyqta ıisshil ıttermen jumys isteýdiń ádisterin kórsetip, tájirıbelerimen bólisti. Halyqaralyq trenıń tórt aptaǵa sozyldy. Kýrs sońynda qatysýshylar qorytyndy emtıhan tapsyryp, sertıfıkattarǵa ıe boldy.
Sharany ótkizý barysynda qyzmettik ıttermen esirtki zattaryn tabý men qylmyskerlerdi ustaý boıynsha oqý ádisteri jurtshylyq nazaryna usynyldy.
