Zorlyq kórgen bolýy múmkin shymkenttik jeti jastaǵy balanyń oqıǵasy el arasyna taralǵaly Saparáli Seltanovtyń esimi qatar atalatyn boldy dep jazady Qamshy.kz aqparat agenttigi today.kz saıtyna silteme jasaı otyryp.
«Meniń týǵan kelinim sol mekteptiń dırektory. Joǵary bilimdi, Qazaq memlekettik qyzdar pedagogıkalyq ýnıversıtetin bitirgen. Men raıkomdy basqaryp júrgende Amangeldi Batyrbekov degen jýrnalıs eki ret depýtattyq saılaýǵa túsip, ekeýinde de óte almaı qaldy. Kim saılaýdan jeńilse, sonyń jaǵyna shyǵyp, maǵan qarsy túrli is-áreket jasaýmen aınalysyp keledi. Men 2010 jyly zeınetke shyqqan adammyn, qazir jasym jetpiste. Keıin aýdan ákiminiń keńesshisi bolyp bir jyl otyrdym. Meniń Saryaǵash aýdany boıynsha saılaý komısıasynyń tóraǵasy bolǵanym Batyrbekovke jaqpady. Bizben 5 ret sottasyp, úsheýinde jeńilip, ekeýinde qashyp ketken. Ózi bir jyl túrmede otyryp keldi. Sonda da qoımaıdy. Men ony moıyndaǵan adam emespin», – dedi Seltanov.
Saparáli Seltanov balany zorlaǵan bolýy múmkin delingen balalardyń arasynda óziniń balasy da, nemeresi de joq ekenin aıtty.
«Zorlandy delingen jeti jastaǵy bala Jánibekov atyndaǵy orta mekteptiń shákirti. Ol balalardyń arasynda meniń balam joq! Seltanovtyń balasy bar degen ótirik aqparat. Bul jerde eki bala bolǵan, eki balanyń bireýiniń ákesi keshe osyǵan shydaı almaı ınsýlt aldy da, ólip qaldy. Jetinshi synyptyń balalarynyń bári qazir tergelip jatyr. Ol balalar buny istedi me, istemedi me, áli eshteńe anyqtalǵan joq. Anyqtalǵan jaǵdaıda da bul mekteptiń ishinde bolǵan oqıǵa emes. Meniń kelinim sondaı jýas adam. Qazir ony da, Jánibekov atyndaǵy mekteptiń dırektoryn da is bitkenshe qyzmetterinen ýaqytsha shettetip qoıdy», – dedi Seltanov.
Seltanov QR bala quqyqtary jónindegi ýákil Zaǵıpa Balıevany syılaıtynyn, biraq sóılesip kórmegenin aıtty.
«Zaǵıpa Balıevamen sóılesken adam emespin. Balıevamen eshqashan birge jumys istegen joqpyn. Ol Qazaqstan Respýblıkasy Ortalyq saılaý komısıasynyń basshysy boldy, al men Saryaǵash aýdany boıynsha saılaý komısıasynyń tóraǵasy boldym. Sodan shyǵyp otyrǵan dalbasa áńgime bul. Allanyń aldynda arym da, júregim de taza. Meniń de ana balaǵa (jeti jastaǵy zorlandy delingen bala, – red.) janym ashıdy», – dedi ol.
Saparáli Seltanov óziniń bul iste taza ekenin qadap aıtty.
«2014 jyly Prezıdent Nazarbaev maǵan «Qurmet» ordenin berdi. Ońtústik Qazaqstan oblysynyń qurmetti azamatymyn. Osynyń bári ishterin taryltyp, kóre almaýshylyqqa ákelip jatyr. Qudaıdyń aldynda da, adamnyń aldynda da tazamyn! Bes ul, bir qyzym bar. Bes ulymnyń bireýi jańaǵy dırektordyń kúıeýi. Ekinshi balam polısıadan otstavkaǵa shyqty, podpolkovnık. Úshinshi balam mekteptiń dırektory bolǵan. Besinshi balam qolymda. Balalarymnyń bári mektepti «Altyn belgimen», joǵary oqý ornyn «Qyzyl dıplommen» bitirgen. Qyzym keshe doktorlyq qorǵady. Ózim jetimder úıiniń tárbıelenýshisimin, áke-shesheden bes jasymda qaldym», – dedi Seltanov.
Eske salatyn bolsaq, Amangeldi Batyrbekov óziniń jeke paraqshasyna Zaǵıpa Balıeva men Saparáli Seltanov 8 jyl birge qyzmettes bolǵanyn jazǵan edi.
