22 naýryzda Qazaqstannyń 13 óńirinde ózen sýy arnasynan tasýy múmkin. Bul týraly «Qazgıdromet» RMK-dan málim etti, dep jazady Qamshy.kz aqparat agenttigi. 

Atap aıtqanda, Batys Qazaqstan, Atyraý, Aqtóbe oblystarynda aýa temperatýrasynyń kóterilýi men kútilip otyrǵan jaýyn-shashyndarǵa baılanysty ózen deńgeıi kóterilip, arnasynan tasýy múmkin.

Qaraǵandy, Aqmola, Soltústik Qazaqstan, Qostanaı jáne Pavlodar oblystarynda kúndiz jańbyrdyń jaýýyna jáne temperatýranyń kóterilýine baılanysty  qardyń erigen sýy qalyptasady, ózender deńgeıi kóterilip, arnalarynan tasýy yqtımal. Shyǵys Qazaqstan oblysynda aýa temperatýrasy birqalypty kóterilip, jekelegen jerlerde jaýyn túsedi. Saldarynan ózenderde seńniń júrýi kúsheıip, arnalarynda keptelister týyndaıdy. 

Ońtústik Qazaqstan jáne Qyzylorda oblystarynda kútilip otyrǵan jańbyrǵa jáne temperatýranyń jylynýyna baılanysty ózen deńgeıleri kóterilip, arnalarynan tasýy múmkin. Almaty jáne Jambyl oblysynyń keı jerlerinde jaýyn-shashyndarǵa oraı ózenderde sý deńgeıi kóterilýi yqtımal.