Almatyda Ulttyq ulan qyzmetkeri adam ómirin saqtap qaldy, dep habarlaıdy Qamshy.kz aqparat agenttigi. 

16 naýryzda tań alageýimmen qyzmetke kele jatqan Ulttyq ulannyń 3650 áskerı bóliminiń áskerı qyzmetshisi, qaraýyl bastyǵy praporshık N.Nurbaev úsheýdiń bir adamǵa jabylyp jatqanyn kórip, kómekke keledi. Jekpe-jek urysynyń tásilderin qoldanǵan ol bir quqyqbuzýshyny ustaıdy, basqalary belgisiz baǵytqa qashyp ketedi.

Almaty qalasynyń Raıymbek dańǵylynyń ústimen ótetin jaıaý júrginshiler kópirinde úsh buzaqy qarsy kele jatqan adamnyń qundy zattaryn almaqshy bolyp, shabýyl jasaǵany belgili boldy. Sol jerde teketires bastalyp ketken, buzaqy úsheýge jábirlenýshi jalǵyz ózi qarsy keledi. Teketires barysynda buzaqylardyń bireýi jábirlenýshige tórt ret pyshaq suǵyp alǵan. 

Jaraqat alǵan adamǵa alǵashqy medısınalyq kómek kórsetken praporshık Nurbaev polısıa qyzmetkerlerin, jedel medısınalyq kómekti shaqyrady. Qazirgi ýaqytta jábirlenýshi S-nyń jaǵdaıy birqalypty.

Praporshık Nurbaev Nurbol Nıazaqynuly Ulttyq ulan qatarynda 20 jyldan astam ýaqyt qyzmet etip keledi. Otbasyly, tórt balasy bar.

Quqyqbuzýshylardy ustaýda batyl áreket etkeni úshin 3650 áskerı bóliminiń qolbasshylyǵy praporshık N.N. Nurbaevty kótermeleý týraly joǵary qolbasshylyqqa usynys jasady. 

Ulttyq ulannyń

«Ońtústik» óńirlik qolbasshylyǵy baspasóz qyzmeti