Almaty oblysy ákiminiń birinshi orynbasary Lázzat Turlashovtyń tóraǵalyǵymen selektorlyq jıyn ótti. Azamattardyń mártebesin anyqtaý men ózin ózi jumyspen qamtyǵandardy rásimdeý jumystary týraly másele qaralǵan jıynda oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Z. İlimjanova baıandama jasady, dep habarlaıdy Qamshy.kz aqparat agenttigi Almaty oblysy ákiminiń baspasóz qyzmetine silteme jasaı otyryp.

Z. İlimjanovanyń aıtýynsha, óńirde búgingi kúni mártebesi anyqtalmaǵan 554,7 myń adam bar. Al mártebesi berilgen azamattar sany 537,8 myń adamdy qurap otyr. Memlekettik organdardyń aqparattyq júıelerinde 131 myń adam ózektendirilgen.

Jalpy azamattardyń mártebesin anyqtaý boıynsha oblystyń kórsetkishi áli de tyńǵylyqty jumys isteýdi talap etedi. Bul iste jaýapkershilik artylyp otyrǵan memlekettik mekemelerdiń ishinde «mindetti zeınetaqy tólemderinsiz jumys istep jatqandar» sanatyn jáne «ózin ózi jumyspen qamtýshylar» kategorıasy boıynsha Memlekettik kiris departamenti, «Qonys aýdarǵandar» sanatymen jumys isteýge tıis Kóshi-qon polısıasy basqarmasynyń júrgizip jatqan jumystary ázirge tolyqqandy nátıjege jetpeı, nebary 15,5 – 40,0 %-ti qurap otyr.

Osy oraıda oblys boıynsha ózektendirý máselesinde artqa tartyp otyrǵan aýdandar da atap ótildi. Naqtyraq aıtqanda, Jambyl, Eńbekshiqazaq, Panfılov, Uıǵyr, Qaratal, Eskeldi, Qarasaı aýdandarynda jumys baıaý júrýde. Al jumyspen qamtý baǵdarlamasyna jumyssyzdar men ózin ózi nátıjesiz jumyspen qamtyǵandar arasynan bir de bir adamdy engizbegen Eńbekshiqazaq, Eskeldi, Jambyl, İle, Kerbulaq aýdandarynyń jumysy synǵa alyndy.

Ózektendirý máselesine baılanysty oblystyq memlekettik kirister departamentiniń, bilim basqarmasynyń, Kóshi-qon departamentiniń, Ádilet departamentiniń basshylary jáne aýdan, qala ákimderi habarlama jasap, qabyldanǵan sharalar men aldaǵy josparlar týraly aıtty.

Oblys ákiminiń birinshi orynbasary L. Turlashov memlekettik organdar men jergilikti atqarýshy organdardyń bul baǵyttaǵy jumysyna kóńili tolmaıtynyn, bir apta ýaqyttyń ishinde azamattardyń mártebesin anyqtaý isin ilgeriletýdi aıaqtaýdy tapsyrdy.

- Mindetti áleýmettik medısınalyq saqtandyrý júıesiniń engizilýine baılanysty júrgizilip jatqan ózektendirý, mártebesin anyqtaý jumystary der kezinde jáne sapaly atqarylýǵa tıis. Jeti kún ishinde aýdan, qala ákimderi, memlekettik organdar, ózderińizge artylǵan jaýapkershilikti abyroımen oryndap, kórnekti nátıjege jetkizýdi tapsyramyn, - dedi L. Turlashov.