Almaty oblysynyń ákimi A. Batalov turǵyndar aldyndaǵy esepti jıynda oblysta árqaısysy 100 basqa arnalǵan 350 otbasylyq sút-taýarly fermasy qurylsa, sonyń 50-i 2018 jylǵa josparlanǵanyn, bul fermalardan jylyna orta eseppen 5 myń kg. sút alynatynyn, sonyń arqasynda bıylǵy jyly sút óndirý 3 esege deıin ósip, óńdeý deńgeıi 43%-ke jetetinin, jáne sút zaýyttarynyń júktemesin tolyq qamtýǵa múmkindik bolatynyn aıtqan edi. Búginde Taldyqorǵandaǵy «JLC Sút » sút zaýytyn shıkizatpen qamtýǵa úles qosyp otyrǵan Qaratal aýdanyndaǵy «Tastóbe Agrofýd» JSHS-nyń jumysy sonyń bir aıǵaǵyndaı.

Qaratal aýdanyndaǵy «Tastóbe AgroFýd» JSHS kesheni - Táýelsizdiktiń 25 jyldyǵyna arnap ashylǵan mańyzdy nysandardyń biri.

2015 jyldan beri iske qosylǵan seriktestiktiń ıeliginde búginde 700-deı asyl tuqymdy iri qara bar. Mundaǵy 410 analyq bastan táýligine 6 tonnadan astam sút alynady. Mundaǵy sút maılylyǵynyń úlesi joǵary deńgeıde, ıaǵnı 4,3 paıyzdy quraıdy. Sondyqtan da bolar, sharýashylyq sútine degen surasyn joǵary.

JSHS jetekshisi Shyńǵys Ahmetovtiń aıtýynsha, sıfrlandyrý talabyna oraı munda jumystyń deni avtomattandyrylǵan júıede atqarylady. Mundaǵy ár saýynshy nemis tehnologıasymen bir mezette arnaıy apparattardyń kómegimen 24 sıyr saýa alady jáne mal men jalpy jumys prosesiniń barlyq derekteri «Dairy plan» júıesinde saqtalady. Sharýashylyqta 65 adam jumys istese, búginde deıin jumysshylarǵa arnap seriktestik bazasynda 15 turǵyn úı salǵan.

Sonymen qatar, "Tastóbe agrofýd" JSHS-de shveısarıalyq sıyrlar táýligine 1,5 tonnaǵa deıin sút beredi. Josparda ony 8 tonnaǵa deıin jetkizý kózdelgen. Saýylǵan sút túgelimen sút ónimderin shyǵaratyn «Úshtóbe Aıdyn» JSHS-ǵa jiberiledi. Sonyń nátıjesinde sút óndirisiniń aýdandaǵy kóshbasshysy ónim túrin kóbeıtip, sapasyn arttyrýǵa múmkindik aldy. - Sút keshenin ashý - aýdanymyz úshin aıtýly oqıǵa. Keshen maldyń joǵary ónimdiligimen, maldy baptaýǵa jasalǵan qolaıly jaǵdaıymen, jańa tehnologıany engizýimen erekshelenedi.

Atap ótsek, JSHS aldaǵy ýaqytta iri qara basyn taǵy 500-ge kóbeıtip, jumysshylar sanyn arttyrýdy da josparlanyp otyr. Qarasaı aýdanynda 750 basqa arnalǵan joǵary ónimdilikti sút-taýarly ferma jáne «Medeý Kommers» JSHS-nyń progresıvti tehnologıa negizinde qýattylyǵy jylyna 5 myń tonna bolatyn sút óńdeý sehy iske qosylǵan.