Óskemende latyn qarpinde jazýdan jarys ótti. Bas júlde ıegerine qazaqtyń qara dombyrasy berildi, dep habarlaıdy Qamshy.kz aqparat agenttigi. 

«Latyn grafıkasy – órkenıet jazýy» atty aksıany oblystyq tilderdi damytý basqarmasy uıymdastyrdy.

– «Rýhanı jańǵyrý» baǵdarlamasy aıasynda ótkiziletin is-sharanyń maqsaty –latyn grafıkasyndaǵy jańa álipbıdiń mán-mańyzyn kópshilikke tanystyrý, turǵyndardyń jańa álipbıge qyzyǵýshylyǵyn arttyrý edi. Bul maqsat oryndaldy, – deıdi SHQO tilderdi damytý basqarmasynyń basshysy Aıdyn Shaımardanov.

Jarys 4 kezeńnen turdy. Birinshi kezeńniń sharty boıynsha sózderdi latyn qarpimen 60 sekýnd ishinde jazý kerek boldy. Bul kezeńge 42 adam qatysty. Kelesi kezeńge ótken 28 qatysýshy maqaldyń ekinshi jartysyn taýyp qana qoımaı, 120 sekýnd ishinde onyń jalǵasyn latyn grafıkasynda jazdy. Úshinshi kezeńde qatysýshylar kúrdeli sózdiń quramyndaǵy áripterden birneshe sóz jazýdan básekege tústi. Ol kezeńnen 3 saıysker jyldamdyq tanytyp, sońǵy kezeńge ótti. Sońǵy kezeńde kók ekranǵa berilgen sýretterge qarap, sóılem qurastyryp, ony latyn grafıkasymen saýatty jazǵan saıyskerlerdiń ishinde Jupar Hýan 1-oryndy, Erlan Magdanov 2-oryndy, Erkejan Muratqyzy 3-oryndy jeńip aldy.