28 naýryzda ınvestısıalar jáne damý vıse-mınıstri Arystan Qabykenovtyń Mońǵolıa Halyq Respýblıkasynyń taý-ken jáne aýyr ónerkásip mınıstri Dolgorsýren Sýmıaabazar bastaǵan delegasıasymen kezdesýi ótti. Onda azamattyq avıasıa jáne mıneraldy resýrstar salalarynda ekijaqty yntymaqtastyqty damytý máseleleri qaraldy, dep habarlaıdy Qamshy.kz aqparat agenttigi QR Premer-mınıstriniń resmı saıtyna silteme jasaı otyryp.

Kezdesý barysynda mıneraldyq resýrstar salasynda yntymaqtastyq týraly memorandýmǵa qol qoıyldy, onyń maqsaty — geologıa men jer qoınaýyn paıdalaný salasyndaǵy ekijaqty qarym-qatynastyń berik negizin qalaý. Memorandým aıasynda taraptar taý-ken ónerkásibi salasy boıynsha aqparattarmen, tájirıbemen, tehnologıalarmen jáne biliktiligi joǵary kadrlarmen almasatyn bolady.

Sondaı-aq, qymbat metaldardy óńdeý salasynda tájirıbe almasý, naqtyraq aıtqanda «Taý-Ken Altyn» affınajdy zaýytyndaǵy tehnologıalyq prosestermen tanysý máseleleri talqylandy.

Budan ózge, kezdesýde eki memlekettiń ýákiletti organdary arasynda azamattyq áýe kemelerimen bolatyn avıasıalyq oqıǵalardyń aldyn alý jáne tekserý salasyndaǵy yntymaqtastyqty nyǵaıtý jóninde kelisimderge qol jetkizildi.

«QR Investısıalar jáne damý mınıstrligi men Mońǵolıanyń azamattyq áýe kemelerimen bolatyn avıasıalyq oqıǵalardyń aldyn alý jáne tekserý Búrosy arasyndaǵy ózara túsinistik» týraly Memorandým aıasynda taraptar Halyqaralyq azamattyq avıasıa týraly konvensıanyń 13-qosymshasynda usynylǵan tájirıbege sáıkes avıasıalyq oqıǵalardy tekserý, aqparatpen jáne tájirıbemen almasýda yntymaqtastyqty damytýǵa nıetti.