QR eńbek jáne halyqty áleýmettik qorǵaý mınıstri Mádına Ábilqasymova QR azamattyǵyn belgilengen ýaqytta alyp úlgermegen etnıkalyq qazaqtardan kelip túsetin ótinishterdiń kóp ekenin aıtty.

Mádına Ábilqasymova Senat depýtattaryna «Qazaqstan Respýblıkasynyń keıbir zańnamalyq aktilerine halyqtyń jumyspen qamtylýy jáne kóshi-qony máseleleri boıynsha ózgerister men tolyqtyrýlar engizý týraly Zań» jobasyn usyndy, dep habarlaıdy Qamshy.kz aqparat agenttigi.

Zańnamaǵa engen ózgeristerdiń biri – oralman mártebesin uzartý. Halyqtyń kóshi-qony týraly qoldanystaǵy zańǵa sáıkes oralman statýsy ony alǵannan keıin bir jyl ótken soń toqtalylady. Alaıda mınıstrdiń aıtýynsha, etnıkalyq oralmandar osy ýaqyt aralyǵynda QR azamattyǵyn alyp úlgermeı jatady. Al ýaqyty ótip ketken soń bul múmkindikten aıyrylady.

«Oralman statýsynan aıyrylǵan etnıkalyq qazaqtar kómek surap jıi keledi. Sol sebepti depýtattar oralman mártebesin úsh aıdan aspaıtyn merzimge uzartýdy usyndy», - dedi Mádına Ábilqasymova.

Mınıstrdiń baspasóz-hatshysy Nurlybek Jeńisbektiń aıtýynsha, oralman mártebesin uzartý týraly sheshimdi jergilikti atqarýshy organ qabyldaıdy jáne ol úsh aıdan artyq bolmaıdy. Sonymen qatar QR aýmaǵynda ómir súretin etnıkalyq qazaqtar oralman mártebesi bitken soń ony qaıta uzartýǵa alty aı ishinde ótinish bere alady.

Buǵan qosa Eńbek jáne áleýmet mınıstrliginde 2018 jyly ár oralmanǵa jeke-jeke óńirlik kvota úılestiriletini týraly sheshim qabyldandy. Búgingi tańda oralmandarǵa beriletin óńirlik kvota qabyldaýynda 622 otbasy tirkelgen, al qonys aýdarýshylardan 1706 otbasy tur.

«Bul norma tek oralmandarǵa ǵana emes, qonys aýdarýshylarǵa da qatysty. Bizdiń járdemaqylar otbasyly adamdarǵa beriledi, alaıda otbasy joq oralman-qonys aýdarýshylar da bar. Sondyqtan biz bul normany qaıta qarastyrdyq. Eger ol adamnyń otbasy bolmasa, memleket tarapynan qoldaý sharalaryna júginýge múmkindigi bar. Al eger otbasyly bolsa, otbasynyń ár múshesine járdemaqy beremiz», - dedi Mádına Ábilqasymova.