"Qazaq handyǵyna 550 jyl" shyǵarmashylyq báıgesine

Bir qudaıdyń dıdaryn Sen kórmegende kim kórer?! – Buhar jyraý On san Alash tusynda, «Abylaılap» tań atqan. «Abylaılap» kún batqan. Tar qursaqty anadan, Taýdaı bolyp týylyp, Táńiri tekti jaratqan. Arqada turyp alqyna, Adyrnasynan aǵytyp, Qytaıǵa kekti oq atqan. Ormanyn nýly oıratyp, Qalasyn shýly qıratyp, Tórt tuıaqtyny týlatyp, Kúnbatysty kúńirente, Kún túbine jol artqan. Aspan tekti dalada, Mańdaıy aıdaı nurlanyp, Abyzy tereń tolǵatqan. Qolyna bolǵan qarýy, Jolyna bolǵan jaraǵy, Nókeri talmaı tún qatqan. Kóktemgi búrdeı kógergen, Tórt qubylamdy teńergen, Han Abylaı tusynda: Jaǵamdy jyrtyp jaý almaı, Arnamdy buryp daý almaı, Qylyshym qynǵa suǵylmaı, Kóılegim qannan jýylmaı, Keskilesken dúspannyń, Keýdeden jany shyryldaı. Elim elshe kún óltip, Erim bórishe tún jortyp, Kóksheni kúnge súıdirip, Arqanyń belin ıdirip, Oń ıyǵymda – Qarataý, Sol ıyǵymda – Alataý, Aıbatymdy asyryp, Aılamdy ishke jasyryp, Er túrkiniń tuqymy, Er Shyńǵystyń rýhyn, Jarty álemge jańǵyrtyp, Jatqan bir darqan el edim. Shaǵala shalqar kól edim!.. Ajal bir aıtpaı jetkende, Saparǵa qaıytpas ketkende, Dúnıa bastan pyr ushyp, Han Abylaı ótkende: Jigerimdi jer qyldym, Shattyǵymdy sher qyldym, Kózimniń jasy kól boldyń, Han Táńir qaqqa aırylyp, Altaıdy tórtke bóldirdim. Azý tisi qaǵylǵan, Arlandaı ashshy ulydym. Qyl arqannan qıylǵan, Qulynd da bolyp shyńǵyrdym. Ata bir dúspan asqan soń, Abdyrap elim sasqan soń, Qoınymnan alyp jarymdy, Aldyna salyp malymdy, Shyǵarmaı alyp janymdy, On saýsaǵyńdaı jumylǵan, Ózińnen qalǵan On Alash, Alty Alash bolyp arydyq. Jat baýyr tartqan qıaǵa, Sýyp bir qalǵan uıaǵa, Táýeldi rýhym qona almaı, Tańynda áreń atyryp, Kúninde zorǵa batyryp, Qarny bir toısa qýanǵan, Teksizden tóre taırańdap, Taıtuıaq jutyp para alǵan, Moınynda qany bodaýsyz, Aqıqat sýdaı suraýsyz, Jırma bir deıtin qatygez, Qabaǵy kúreń ǵasyrda, Qaıyra qaıta jyl sanap, Qarıa taýdaı kúńirenip, Qanymmen jazǵan jyry ma, Qaıran da kóńil tolar ma? Torǵynnan jibek kıdirip, Torqadan belin býdyryp, Toǵyz aı elin kúttirip, Toqsan da qatyn tolǵatsa; Alty Alashtan alpys er, Úsh júzimnen úsh júz ul, Jolyńa qurban atalsa, Qapyda ketken qasqalar, Qapyda ketken qasqalar, Qaıranda ornyń tolar ma? Qaıranda ornyń tolar ma?! Umtyl ZARYQQANULY – 1987jyly 26jeltoqsanda Shyǵys Túrkistannyń Altaı aımaǵy Qaba aýdanynda ómirge kelgen. Qazir L.N.Gýmıleov atyndaǵy Eýrazıa Ulttyq ýnıversıtetiniń magıstranty. «Bozjýsan búr jarǵanda...» jyr jınaǵynyń avtory.