On shaqty oralman Almaty qalalyq ishki saıasat basqarmasyna 8 sáýir kúni saǵat 10 men 17 aralyǵynda "Saryarqa" kınoteatrynyń artyndaǵy saıabaqta beıbit jıyn ótkizýdi surap hat tapsyrdy. Ótinish berýshiler hatta beıbit jıynǵa myń shaqty adam qatysady dep kórsetken.

Ózin Qytaıdan kelip, Qazaqstan azamattyǵyn aldym dep tanystyrǵan Dáýletbek Erboldyń aıtýynsha, Qytaıǵa ketken 75 jastaǵy anasynyń tulqujatyn Qytaı bıligi tartyp alyp, qaıtaryp bermeı, sergeldeńge túsirgen.

- Ol jaqtaǵy adamdar da, olardyń bul jaqtaǵy týystary da zardap shegip jatyr. Ol jaqtaǵy qazaqtardyń qujatyn tartyp alyp, qamap, saıası úırený sabaqtaryna jiberip jatyr. Ne úshin ustap otyr, bir sebep bolýy kerek qoı. Biz sherýge shyǵamyz, Qytaı dıplomattary kelip jaýap bersin, - dedi Erbol Dáýletbek.

Narazy top buǵan deıin ákimdikke beıbit sherý ókizýge ruqsat surap eki hat jazǵanyn, biraq eki ótinishteri de oryndalmaǵanyn aıtady.

- Alǵashqy ótinishte mıtıńini Qytaı konsýldyǵy aldynda ótkizýge ruqsat suraǵanbyz. Biraq ákimdik ol jerde mıtıń ótkizýge bolmaıdy dep, sherýdi "Saryarqa" kınoteatrynyń artynda ótkizýdi usyndy. Sosyn "Saryarqanyń" artynda ótkizýdi surap ekinshi ret hat jazǵanda ótinish berýshilerdiń jeke bas málimetteri durys emes dep keri qaıtardy. Osy aryzymyzda barlyq aqparatymyzdy tolyqtyryp ákelip turmyz, - dedi Erbol Dáýletbek.

Jınalǵandar beıbit sherýde Qytaı úkimetinen sol elde zańsyz ustap otyrǵan týystaryn bosatýdy, olardy qýdalaýdy toqtatýyn jáne Qytaı bıliginiń Qazaqstanǵa kóshkisi keletin qazaqtarǵa ruqsat berýin talap etetinin aıtady.

Hatty ákimdik qyzmetkeri Aqerke Ábdiqadyrova qabyldap aldy. Onyń aıtýynsha, hatqa 15 kún ishinde jaýap berilmek.

Qytaıdaǵy etnıkalyq qazaqtardyń jappaı qysymǵa ushyraǵany týraly aqparattar 2017 jylǵy sáýir aıynan taraı bastaǵan. Shyńjańda ustalǵandar arasynda Qytaıdan tarıhı Otanyna oralyp, Qazaqstan azamattyǵyna ıe bolǵandar da bar.