Halyqty qoljetimdi baspanamen qamtýǵa arnalǵan «7-20-25» baǵdarlamasynyń sharttary áli daıyn emes. Degenmen, arzan ıpotekanyń shekti kólemi belgilendi, dep xabarlaıdy QazAqparat.

QR Ulttyq banki tóraǵasynyń orynbasary Oleg Smolákovtyń aıtýynsha, jańa baǵdarlama boıynsha Astana, Almaty, Atyraý men Aqtaý qalalary úshin arzan ıpotekanyń shekti mólsheri 25 mln teńge bolady. 

«Basqa qalalardyń turǵyndaryna 10 mln teńgege deıin, al aımaqtarda 7 mln teńgege deıin nesıe beriledi. Mysaly, iri qalalardy alsaq, 25 mln teńgege eki bólmeli páterdi alýǵa bolady. Baspananyń aýdany 70 sharshy metrdeı. Sonda nesıe alǵan adam aı saıyn shamamen 170 myń teńge tólep otyrady», - dedi O.Smolákov búgin Astanada ótken baspasóz máslıxatynda. 

Onyń aıtýynsha, iri qalalarda arzan ıpotekanyń shekti mólsheri 25 mln teńge bolsa, onyń syrtynda taǵy 20 prosenttik alǵashqy jarna bar. Sonda Astana, Almaty, Atyraý men Aqtaý qalalarynyń turǵyny 30 mln-nyń páterin 7 prosenttik nesıege ala alady. Barlyq nesıeler tek teńgemen ǵana beriledi.

«Jalpy, baǵdarlamanyń barlyq sharttary áli pysyqtalyp jatyr. Mamyr aıynda biz onyń bárin Ulttyq banktiń qaýlysymen bekitemiz. Sonda baǵdarlamanyń naqty formasy bolady. Josparǵa sáıkes, ekinshi deńgeıli bankter úmitkerlerdi iriktep, ıpotekany beredi. Al jańa ıpotekalyq kompanıa ol nesıelerdi satyp alady. Sóıtip, ıpotekanyń jyldyq mólsherlemesi 7 prosentke tómendeıdi. Dál osyndaı júıemen buryn Qazaqstannyń ıpotekalyq kompanıasy jumys istegen. Defolt bolsa, ıpoteka bankke qaıtarylady. Ol óz kezeginde problemalyq nesıemen jumys isteıtin bolady. Buryn bizde ıpoteka shetel valútasymen berildi. Devalvasıadan keıin teńge baǵamy ózgerip, úleskerlerge qosymsha salmaq tústi. Al jańa baǵdarlama boıynsha barlyq nesıeler tek teńgemen ǵana beriledi», - dep atap kórsetti O.Smolákov.