Búgin Almatyda Ratel.kz jáne Forbes Kazakhstan jýrnalıseriniń ustalǵany habarlandy.

Almatyda Ratel.kz saıtynyń bas redaktory Marat Ásipov, orynbasary Sapa Mekebaev jáne jýrnalıs Anna Kalashnıkova ustaldy.  Bul týraly saıttyń Facebook-tegi paraqshasynda habarlanǵan.

Forbes Kazakhstan jýrnalynyń shyǵarýshysy Armanjan Baıtasovtyń habarlaýynsha, búgin túske taman Ratel.kz jáne Forbes Kazakhstan jýrnalynyń redaksıalaryn polısıa tintip, tirntýge kelgenderdiń bir toby jýrnal bas redaktorynyń orynbasary Aleksandr Vorotılovty alyp ketken.

«Keńsege 12 adam kirip kelgende biz jumys istep otyrǵanbyz. Bizdiń ótinishimizben olar qujattaryn kórsetti: Almaty İİD polısıa qyzmetkerleri ekenin bildik. Olar eki top bolyp keldi. Aldymen bárimizdi kabınetten shyǵaryp, telefondarymyzdy tapsyrýdy buıyrdy. Kabınette orynbasarym Aleksandr Vorotılov qaldy. Bárimiz qalǵymyz kelgen, alaıda shyǵýymyzdy talap etti», - dedi basylymnyń bas redaktory Asqar Áýkenov.

Eki redaksıada tintýdiń ne úshin júrgizilip jatqany ázirge belgisiz.

2017 jyly Almaty soty burynǵy qarjy mınıstri, bıznesmen Zeınolla Kákimjanov pen uly Ilhalıd Kákimjanovtyń paıdasyna Forbes Kazakhstan jáne Ratel.kz-ten 50 mıllıon teńge óndirip berý týraly sheshim shyǵarǵan.

Ratel.kz pen Forbes.kz jýrnalısik zertteýlerinde «Zeınolla Kákimjanovtyń sybaılas jemqorlyqqa qatysy bar» degen tujyrym jasaǵan. Sot sonymen qatar Forbes.kz saıty men onyń áleýmettik jelilerdegi akkaýnttarynan 10 maqalany joıýǵa jáne taǵy toǵyz maqalada keltirilgen málimetterdi teristeýge mindettegen. Ratel.kz saıty sot «shyndyqqa sáıkespeıdi» dep tapqan 13 maqalany joıyp, teristeýge mindetti bolǵan.

Sot sheshimimen kelispegen basylym jýrnalıseri oǵan shaǵymdanatynyn málimdegen. 30 naýryzda Almaty soty Ratel.kz saıtyn buǵattaý týraly sheshim shyǵarǵan.