Qazaqstanda elektrondyq úkimet portalynda turǵylyqty jeri boıynsha onlaın tirkelý rásimi ózgerdi, dep habarlaıdy Qamshy.kz aqparat agenttigi «Azamattarǵa arnalǵan úkimettiń» baspasóz qyzmetine silteme jasaı otyryp.

Endi onlaın-tirkeý úshin azamattarǵa 20 mınýt jetkilikti. Sondaı-aq Qazaqstan Respýblıkasynyń Salyq kodeksine engizilgen ózgeristerge sáıkes, bıyl  qańtar aıynan bastap tirkeý úshin memlekettik baj alynbaıdy.

Eske sala keteıik, buryn elektrondyq úkimet portaly arqyly tirkelgende 10 % AEK kóleminde memlekettik baj tóleý kerek bolatyn. Sosyn «Azamattarǵa arnalǵan úkimet» memlekettik korporasıanyń front-ofısine kelip, jeke kýálik chıpine tirkeý týraly derekter jazbasyn engizý úshin kóshi-qon qyzmetkerine júginý qajet edi.

Al bıylǵy naýryz aıynan bastap portal arqyly  turǵylyqty jeri boıynsha tirkelý rásimi aıtarlyqtaı jeńildetildi.  Endi jyljymaıtyn múlik ıesi jáne tirkeletin azamat egov.kz portalynda tirkelgennen keıin, tirkelýshi ótinish berip, menshik ıesi óziniń elektrondyq-sıfrlyq qoltańbasymen rastaýy tıis.

Ótinish berilgennen keıin  derekter shamamen 10 mınýtta óńdeledi, sodan keıin tirkelgen mekenjaı boıynsha  anyqtama  alýǵa  tapsyrys berýge bolady.  Bul qyzmetke ESQ-sy bar kez kelgen azamat Qazaqstannyń barlyq aımaqtarynda qol jetkize alady.