Májilis Tóraǵasy Nurlan Nyǵmatýlın Soltústik Qazaqstan oblysyna sapary barysynda birqatar kásiporyndardy aralap, eńbek ujymdarymen kezdesti, dep habarlaıdy Qamshy.kz aqparat agenttigi. 

         Májilis Spıkeri óńirdegi eń kóne ári eń iri kásiporynnyń biri Kırov atyndaǵy zaýytta bolyp, onyń «Sıfrlyq Qazaqstan» baǵdarlamasy aıasynda qolǵa alynǵan jańa jumys baǵytymen tanysty.

         Eńbek ujymymen júzdesý barysynda N. Nyǵmatýlın  óndiristi jańǵyrtý mańyzdylyǵyn alǵa tarta kelip, Elbasy usynǵan áleýmettik bastamalarǵa aıryqsha nazar aýdardy. Turǵyndar aldynda baspanaly bolýdyń,  salyqty azaıtyp,   jalaqyny kóbeıtýdiń,   jańa tabys kózin ashýdyń  múmkindikteri týrasynda jan-jaqty baıandady. Sapaly bilim jaıyn sóz etkende Májilis Tóraǵasy:

- Joǵary bilimniń sapasy men qoljetimdiligin arttyrý maqsatynda qazir jyl saıyn bólinetin 54 myń grantqa qosymsha taǵy 20 myń grant bólinedi. Onyń kóbi tehnıkalyq mamandyqtar boıynsha bakalavrlyq bilim berýge arnalady. Bul joǵary bilim alýdyń qoljetimdiligin arttyrýmen qatar, tórtinshi ónerkásiptik revolúsıa jaǵdaıynda suranysqa ıe bolatyn jańa mamandardy daıarlaýǵa jol ashady. Sonymen birge, stýdentterdi jataqhanamen qamtamasyz etý máselesin ońtaıly sheshetin bolady,-dedi. 

Prezıdenttik bes áleýmettik bastamaǵa keńinen toqtalǵan Palata Spıkeri olardyń barlyǵy otandyq ekonomıkanyń naqty esebi jasalǵan múmkindikteri boıynsha qarastyrylǵanyn atap ótti.

- Elbasynyń tapsyrmasy boıynsha Úkimet arnaıy Jol kartasyn jasady. Bul Prezıdentimizdiń bastamalaryn júzege asyrýdyń naqty, josparly qadamdary. Oǵan sáıkes, oryndaý tetikteri men merzimi belgilenip, jaýapty mınıstrlikter men qurylymdar bekitilgen , - dep atap ótti N.Nyǵmatýlın.

Osy rette Májilis Tóraǵasy qazirdiń ózinde Parlamentte áleýmettik jańǵyrtý aýqymdy baǵdarlamasyn zańdyq turǵydan qamtamasyz etý jumystary bastalǵanyna toqtaldy.  

- Prezıdenttik bes áleýmettik bastamalardyń sapaly quqyqtyq-normatıvtik bazasyn qurý Parlament depýtattarynyń osy sesıadaǵy jumysynyń negizgi basymdyǵy bolyp tabylady,- dedi Palata Tóraǵasy.

Májilis Tóraǵasynyń pikirinshe, Parlament 15 shaqty Zańdarǵa ózgerister engizbek. Olardyń qatarynda Azamattyq, Búdjettik, Salyq kodeksteri, bilim týrasynda, bank jáne tólemder týraly zańnamalyq qujattar bar.  

Sonymen birge, 2019-2020 jyldarǵa arnalǵan respýblıkalyq búdjetti qarap, aǵymdaǵy búdjetke ózgerister men tolyqtyrýlar engizý kózdelip otyr.

Kezdesý barysynda ujym qyzmetkerleri Elbasynyń áleýmettik bastamalary jańa serpin bergenin jáne zor senim artyp otyrǵandaryn jetkizdi.