Aqparat jáne komýnıkasıalar mınıstri Dáýren Abaev óziniń Facebook-taǵy paraqshasynda Ratel.kz jáne Forbes.kz jýrnalıseriniń ustalýyna qatysty pikir bildirdi, dep habarlaıdy Qamshy.kz aqparat agenttigi. 

«Ózderińiz bilesizder, tergeý kásipker Zeınolla Kákimjanovtyń jalǵan aqparat taratý týraly aryzy boıynsha bastalǵan edi. Aryzdanýshynyń shaǵymy sot tarapynan birneshe ret qanaǵattandyrylǵany da osyǵan sebep boldy.

Búginde «Forbes» saıty ádettegideı jumysyn jalǵastyryp otyr. Meniń bilýimshe, tergeý sharalary bul BAQ-tyń bir ǵana qyzmetkerine qatysty júrgizildi. Ustalǵandardyń eshbirine prosesýaldyq sharalar qoldanylmasa da, bul jýrnalısik ortany qatty dúrliktirdi. Buqaralyq medıa ókilderiniń alańdaýyn túsinemiz.

Bizdiń mınıstrlik birneshe táýlik boıy quqyq qorǵaý organdarymen úzdiksiz baılanysyp turdy. QR AKM – azamattyq memorgan, tergeý sharalaryna aralasýǵa quqyǵymyz joq.

Alaıda osy istegi taraptarǵa araǵaıyn bolý múmkindigin qarastyryp jatyrmyz. Sonymen qatar Aqparat jáne komýnıkasıalar mınıstrligi tergeýdiń barynsha ashyq ári ádil bolýyna kúsh salady», - dep jazdy mınıstr.

Eske salaıyq, Almatyda Ratel.kz saıtynyń bas redaktory Marat Ásipov, orynbasary Sapa Mekebaev, jýrnalıs Anna Kalashnıkova jáne Forbes Kazakhstan jýrnaly bas redaktorynyń orynbasary Aleksandr Vorotılovty polısıa tutqyndaǵan bolatyn.

Ratel.kz pen Forbes.kz jýrnalısik zertteýlerinde burynǵy qarjy mınıstrli, kásipker Zeınolla Kákimjanovtyń «sybaılas jemqorlyqqa qatysy bar» degen tujyrym jasaǵan. Sot sonymen qatar Forbes.kz saıty men onyń áleýmettik jelilerdegi akkaýnttarynan 10 maqalany joıýǵa jáne taǵy toǵyz maqalada keltirilgen málimetterdi teristeýge mindettegen. Ratel.kz saıty sot «shyndyqqa sáıkespeıdi» dep tapqan 13 maqalany joıyp, teristeýge mindetti bolǵan.

Sot sheshimimen kelispegen basylym jýrnalıseri oǵan shaǵymdanatynyn málimdegen. 30 naýryzda Almaty soty Ratel.kz saıtyn buǵattaý týraly sheshim shyǵarǵan.