Gennadıı Golovkın men Saýl Alvares arasyndaǵy 5 mamyrǵa josparlanǵan ekinshi jekpe-jek ótpeıtin boldy. Bul týraly «Golden Boy» promoýterlik kompanıasy uıymdastyrǵan baspasóz jıyny kezinde resmı túrde aıtyldy, dep habarlaıdy vesti.kz.

Meksıkalyq boksshy jekpe-jekke shyǵýdan bas tartty. «Kanelo» NVO telearnasynan, MGM arenasynyń uıymdastyrýshylarynan, demeýshileri men jankúıerlerinen keshirim surady. Atletıkalyq komısıanyń sheshimin qurmetteıtinin de aıta ketti.

Ol dopıngten aqtalyp shyǵyp, tamyz nemese qyrkúıek aıynda jekpe-jek ótkizgisi keledi. Genamen ekinshi ret sol kezde judyryqtasýǵa nıetti.

Bul jaǵdaıǵa «Golden Boy» promoýterlik kompanıasynyń prezıdenti Erık Gomes te óz ókinishin bildirdi.

- 5 mamyrǵa josparlanǵan ekinshi kezdesýden bas tarttyq. 18 sáýir kúni komısıa tyńdalymy ótip, resmı sheshim shyǵady. 5 mamyrǵa deıin jekpe-jekti keń kólemde jarnamalaýǵa ýaqyt az, - dedi ol.

Aıta keteıik, naýryz aıynyń basynda meksıkalyq boksshynyń dopıng synamasynan klenbýterol tabyldy. Bul preparat adamǵa bulshyqet kólemin ósirýge jáne maıdy joıýǵa kómektesedi. Al sporttan tys bul preparat janýarlardyń salmaq qosýy úshin de paıdalanylady eken.

«Kanelo» bul preparattyń qanyna et arqyly túskenin aıtyp aqtaldy.

Orta salmaqta WBA (Super), IBO, WBC jáne IBF tujyrymdary boıynsha álem chempıony ataǵyna ıe otandasymyz Gennadıı Golovkın 5 mamyr kúni jekpe-jek ótkizgisi keledi. Al GGG-men judyryqtasqysy keletin boksshy kóp. Atap aıtqanda, amerıkalyq Djermall Charlo men Demetrıýs Andrade, ýkraınalyq Sergeı Derevánchenko, ırlandıalyq Gerı O Sallıvan, brazılıalyq Iamagýchı Falkao, meksıkalyq Hılberto Ramıres pen Hýlıo Sezar Chaves (kishisi) bar.

Eske salaıyq, Gennadıı Golovkın men Saýl Alvares arasyndaǵy alǵashqy jekpe-jek 2017 jyldyń 17 qyrkúıeginde ótip, teń nátıje tirkelgen bolatyn.