DVK materıaldaryn shekteýge qatysty sot talabyn talabyn oryndamaǵan jaǵdaıda Telegram mesenjeri Qazaqstanda buǵattalýy múmkin. Bul týraly Aqparat jáne komýnıkasıalar mınıstri Dáýren Abaev aıtty, dep habarlaıdy RIA Novostı.

Mınıstrdiń sózinshe, Telegram mesenjerine DVK materıaldaryn óshirý nemese DVK materıaldaryna Qazaqstan aýmaǵynan kirýge shekteý qoıý jónindegi sot sheshimi jiberilgen.

«Qazir bizdiń eskertý hatymyz Telegram mesenjeri ákimshiliginiń qaraýynda jatyr. Sot talaby oryndalmasa, mınıstrlik QR zańnamasy sheńberinde mesenjerdiń respýblıka aýmaǵynda taralýyn shektep, tipti, tolyq buǵattaýy múmkin», - dedi Dáýren Abaev.

Naýryzdyń orta sheninde Astana qalasynyń Esil aýdandyq soty tirkelmegen DVK qozǵalysyn ekstremıstik uıym dep tanyp, onyń Qazaqstan Respýblıkasy sheginde jumys isteýine tyıym salǵan edi. Uıymdy qashqyn bankır Muhtar Ábilázov basqarady.

Qazaqstannyń Bas prokýratýrasy «Ábilázovtiń maqsaty – bılikti basyp alý» dep málimdedi.

2017 jyldyń maýsym aıynda Almaty soty Muhtar Ábilázovti qylmystyq top qurǵany jáne bank qarjysyn jymqyrǵany úshin kináli dep taýyp, 20 jylǵa bas bostandyǵynan aıyrýǵa úkim shyǵarǵan bolatyn. Sot shetelde jasyrynyp júrgen Ábilázovtiń qatysýynsyz ótti. Sybaılas jemqorlyqqa qarsy kúres boıynsha ulttyq búronyń dereginshe, eks-bankır memleketke 7,5 mıllıard dollardan astam zıan keltirgen.