Almaty ákimi Baýyrjan Baıbek keńeıtilgen keńes ótkizdi, onyń barysynda merdigerlik uıymdar megapolıste aldaǵy ýaqytta joldardy jóndeýdiń naqtyly merzimi men kólemi kórsetilgen jańarǵan jospardy usyndy. Bul jaıynda Almaty qalasy ákimdigi habarlady.

Qala basshysy keńeske qatysýshylardyń nazaryn turǵyndarǵa qolaıly bolý úshin jumysty barynsha sapaly ári qysqa merzimde aıaqtaýǵa aýdardy. Qazirdiń óznide barlyq merdigerlik uıymdar arnaıy jasalǵan qorshaýlardy aldy. Ár obektide merdiger - kompanıa dırektornynyń, jumysqa tehnıkalyq baqylaý jasaıtyn jáne aıaqtalý merzimin qadaǵalaıtyn uıymdardyń baılanystary kórsetilgen pasport ornatylady. 

Qalanyń Jolaýshylar kóligi jáne avtomobıl joldary basqarmasynyń basshysy Maqsut Isahov ár aqaýly kóshe boıynsha bordúrler sanynyń anyqtalǵandyǵyn jáne olardyń deni durys ekenin, jasalǵan bul akt keıin Naýryzbaı jáne Alataý aýdandaryna beriletinin aıtty.

«Bıylǵy jyly jóndeletin ár kóshe boıynsha biz aqaý aktisin jasadyq. Bulardaǵy alynyp qalǵan bordúrler qaıta qoldanylady, ıaǵnı trotýarlar, pandýstar jáne bıyl jóndeý jumystary qarastyrylmaǵan kósheler úshin paıdalanylady. Barldyq tıisti aqparat ákimdiktiń «Open Almaty» qoǵamdyq qabyldaýynyń portalynda jarıalanady» - dedi ol.

Megapolıs basshysynyń tapsyrmasy boıynsha aýdandyq ákimdikter júrginshilerge qıyndyq týǵyzatyn túrli qurylystar jaýlap alǵan trotýarlardy tekserdi. Stıhıaly turaqtyń aldyn alý jáne júrginshi qaýipsizdigin qamtamasyz etý úshin qozǵalys qysqaryp, trotýarlar abattandyrylady.

Eske salsaq, Almatyda 2018 jyly uzyndyǵy 155 shaqyrym bolatyn 157 kóshe jóndeledi. Maqataev, Baıtursynov jáne Jarokov kóshelerindegi tramvaı joldaryn alyp tastaý qarastyrylǵan. Jol jıegindegi trotýarlar abattandyrylady, aryq naýalary jańarady, qajet emes konstrýksıalar alynady, aınala jasyldandyrylady, buǵan qosa turaq qaltalary qıǵashtanady.