Órt qaýipsizdigi jónindegi memlekettik baǵdarlamalardy iske asyrýdyń aıasynda búgin  «MEGA Silk Way», «SaryArka» jáne «Azıa Park» saýda oıyn-saýyq ortalyqtarynda «Qaýipsizdik mektebi aksıasy júrgizilip jatyr, dep habarlaıdy elorda ákimdiginiń resmı saıty. 

Sharaǵa 13-14 jastaǵy 500-ge tarta mektep oqýshysy qatysýda. Olardyń jartysy «MEGA Silk Way» saýda oıyn-saýyq ortalyǵynda ótip jatqan aksıada óz bilimin ortaǵa salyp jatyr. 

Saýda oıyn-saýyq ortalyǵynda elordanyń № 1, 3, 6, 15, 45 jáne № 54 mektepteriniń oqýshylary qaýipsizdik erejelerin qanshalyqty biletinderin kórsetýde. Eń kishkentaı kelýshiler úshin eki kezeńnen turatyn kvest-oıyn uıymdastyryldy. 

Oıynǵa 10 adamnan turatyn 6 komanda qatysyp jatyr. Alǵashqy kezeńde komandalar «qutqarýshylar» rólin somdady. Oıyn barysynda qatysýshylar óz bilimin jaqsy kórsete alyp, alǵashqy medısınalyq kómek kórsetý kezinde tapqyrlyq tanytty.

Ekinshi kezeńde qatysýshylar «zardap shegýshiler» boldy. Bul kezeńde olar SOSO nysandaryna baryp, tıisti tapsyrmasyn oryndap, qaýipsiz alańdar men shyǵý esikterin izdedi.

Oıyn baǵdarlamasynyń uzaqtyǵy eki saǵatty quraıdy. Osy ýaqyt aralyǵynda balalar óz eptiligin, zerektigi men josyǵy, bilimi men qabiletterin tanytyp qana qoımaı, apatty jaǵdaıda ózin-ózi qalaı ustaý qaǵıdalaryn meńgerdi. 

Mektep oqýshylary mundaı sharalardyń paıdaly da qyzyqty ekendigin atap ótedi. 

«Men munda tótenshe jaǵdaı oryn alǵanda óz-ózimdi durys ustaý qaǵıdalaryn meńgerip, komandada jumys isteýdi úırendim. Biz basqalarǵa úlgi bola ala alamyz dep oılaımyn. Mektep oqýshylary úshin osyndaı sharanyń uıymdastyrylǵany qýantady», -deıdi № 6 mektep-gımnazıanyń 8 synyp oqýshysy Asylhan Jabaǵın. 

Oıyn aıaqtalǵan soń, shara qonaqtarynyń aldynda M. Ótemisov atyndaǵy mektep oqýshylary saraıynyń shyǵarmashylyq toby men elordalyq ártisteri óner kórsetti.

Astana qalasynyń TJD qoldaǵan shara elorda ákimdiginiń bastamasymen «Biz qaýipsiz qala úshin» aksıasy aıasynda ótýde.