1%-ben nesıe beretin «NurKapital» baǵdarlamasy Mańǵystaý óńirinde tanystyryldy, dep habarlaıdy Qamshy.kz aqparat agenttigi oblys ákiminiń baspasóz qyzmetine silteme jasap.
Elbasy Nursultan Nazarbaevtyń bes áleýmettik bastamasynyń biri — shaǵyn nesıeni keńeıtý. Memleket basshysy bul bastamanyń myńdaǵan adamǵa óz bıznesin ashýǵa múmkindik beretinin atap ótti. Mańǵystaý oblysynda Elbasy tapsyrmalaryn iske asyrý jáne qoldaý maqsatynda shaǵyn jáne orta bıznes nesıelerin jylyna 1% —ben beretin "Nur Kapital" baǵdarlamasy iske qosyldy. Bul jobany memleket basshysy qoldap, maquldaǵan.
"Biz halyqtyń qoǵamdyq sana-sezimin jańǵyrtý úshin shaǵyn jáne orta bıznesti damytýǵa naqty jaǵdaı týǵyzý mindetin qoıdyq. Qazirgi ýaqytta jalpy nesıe portfeli 2,7 mlrd. teńgeni quraıdy. Búgingi tańda "Qazaqstan Halyq Banki" AQ Mańǵystaý oblystyq fılıalymen (400 mln. teńge), "Qazaqstan Halyq Banki" AQ-nyń Jańaózen óńirlik fılıalymen (400 mln. teńge) jáne "ForteBank" AQ (322 mln. teńge), "Sberbank Rossıı" AQ EB (150 mln. teńge) kelisimge qol qoıyldy. Sondaı-aq, osy baǵdarlamaǵa qatysý úshin "Bank SentrKredıt" AQ jáne "Atameken Mıkrofınans" JSHS ótinimderin berdi",- dedi Mańǵystaý oblysynyń ákimi Eraly Toǵjanov.
"NurKapital" baǵdarlamasyna qatysqysy keletin barlyq kásipker qajetti qujattardy daıyndaý jáne jınaýmen aınalysatyn Jańaózen qalasyndaǵy jáne oblystaǵy bıznes-bólimshelerge óz ótinimderimen júgine alady. Sondaı-aq, kásipker barlyq qajetti qujatty ekinshi deńgeıli bankterge tapsyryp, maquldanǵan soń bankpen birlesip, sýbsıdıa alý úshin qujattardy oblystyq úılestirý keńesine jiberedi. Aımaqtyq úılestirý keńesi árbir aýdan úshin mańyzdy dep tanylǵan jobalardy qarastyrady.
«Qazirgi tańda oblystaǵy qalalar men aýdandar ákimdikterinde 2 mlrd. teńgeden astam qarjyǵa kásipkerler tarapynan 192 ótinim kelip tústi. Olardyń 35% —y mal sharýashylyǵy sektorynda,óńdeý, jeńil ónerkásip — 22%, týrızm — 16%, kólik jáne qoıma — 8%, ósimdik sharýashylyǵy — 5%, densaýlyq saqtaý — 5%, qyzmet kórsetý — 3%, bilim berý — 3%, tamaqtaný qyzmetteri — 1%, kóterme jáne bólshek saýda — 1%, ınvestısıalar — 0,3%, óner, oıyn-saýyq jáne demalys — 0,1%», — dedi Mańǵystaý oblystyq kásipkerlik jáne saýda basqarmasynyń basshysy Venera Mustapaeva.
