Aqtóbe qalasynda Batys Qazaqstandaǵy eń iri otbasylyq demalys saıabaǵy K.Nokın men 312-shi atqyshtar dıvızıasy dańǵyldarynyń qıylysynda ashylady. Onyń jalpy aýdany 3,5 ga quraıdy, jobaǵa salynǵan ınvestısıalar kólemi 658 mln. teńgeden asady. Tapsyrys berýshi - «NuraiInvestGroup» aksıonerlik qoǵamy.

Ótken senbide oblys ákimi Berdibek Saparbaev ýchaskedegi qurylys jumystarynyń barysymen tanysty.

Ashyq aspan astyndaǵy biregeı oıyn-saýyq saıabaǵy aǵymdaǵy jyldyń 1-maýsymynda ashylady. Bul jerde haıýanattar parki, etnoaýyl, uıaly planetarıı, mını-golf alańy, jazǵy kitaphana, úlken labırınt, quzǵa órmeleý, jyl boıǵy muz aıdyny, sport jáne oıyn alańdary, batýttar, arqandar parki, tır, boýlıń taǵy basqalar bolady.

– Balalar men eresekterge arnalǵan bul otbasylyq saıabaǵy demalys pen oıyn-saýyqty biriktirýge múmkindik beredi. Jabdyqtarǵa tapsyrys berildi, jetkizilip jatyr, dedi – oblys ákimine «NuraiInvestGroup» dırektory Erbol Muhamedjan.

Aımaq basshysy saıabaq sapasyna erekshe nazar aýdara otyryp, saıabaqtyń «Baqytty bala» jobasy aıasynda kishkentaı aqtóbelikter úshin eń úlken syılyq bolatynyn atap ótip, ony Halyqaralyq balalardy qorǵaý kúnine deıin bitirýdi tapsyrdy.

Eske sala keteıik, demalys saıabaǵy «Kıiz úı parki» iri jobasynyń bir bóligi bolyp tabylady, onyń ekinshi kezeńin 2020 jylǵa deıin iske asyrý josparlanyp otyr. Atap aıtqanda, ınvestorlar osy ýaqytqa deıin 9 mıllıard teńge turatyn mádenı-saýyq kesheniniń qurylysyn aıaqtaýdy kózdep otyr.

– Keshenniń jalpy aýdany 40 myń sharshy metrdi quraıdy. Bul batys óńirindegi jáne Qazaqstandaǵy eń iri saıabaqtar tizimine enetin bolady. Segiz qabatty ǵımarat úsh bloktan turady: iskerlik-ákimshilik, sporttyq-saýyqtyrý jáne mádenı demalys oıyn-saýyq bolyp bólinedi dep, - Erbol Muhamedjan sózin jalǵastyrdy.

 Jobada ınvestısıalyq ýchaskeler, asfálttaý, kógaldandyrý, jaqyn mańdaǵy aýmaqty abattandyrý qarastyrylǵan. Atap aıtqanda, 500-ge jýyq shyrsha jáne kanadalyq úıeńkiler otyrǵyzylady.