Búgin Astanada Ortalyq komýnıkasıalar qyzmeti alańynda «Qazaqstan» RTRK» AQ uıymdastyrýymen «Men qazaqpyn» ulttyq megajobasyna qatysty baspasóz konferensıasy bolyp ótti, dep habarlaıdy Qamshy.kz aqparat agenttigi.

Atalmysh sharaǵa «Qazaqstan» RTRK» AQ Basqarma tóraǵasy Erlan Qarın men qoǵam qaıratkeri Myrzataı Joldasbekov qatysty.

Ulttyq arna basshysynyń aıtýynsha, Qazaqstan arnasynda bastaý alǵan atalmysh mega joba qazaqtyń ulttyq ónerin dáripteıtin, kúı, jyr-termelerdi damytyp, halyqqa nasıhattaıdy.

«Men qazaqpyn» jobasynyń negizgi maqsaty – elimizdiń túkpir-túkpirindegi dástúrli án aıtýshylardy, termeshi, kúıshilerdiń basyn bir arnada toǵystyryp, elimizdiń ár aımaǵynda qalyptasqan óner mektepteriniń tańdaýly týyndylaryn dáripteý maqsatynda ata-babadan mura bolyp kele jatqan tól ónerimiz kúı, jyr-termeni damytyp, zamanǵa saı jańashalandyryp, óskeleń urpaqqa nasıhattaý.

«Byltyr, esterińizde bolar, dál osy ýaqyttarda Elbasynyń «Bolashaqqa baǵdar: Rýhanı jańǵyrý» baǵdarlamalyq maqalasy shyqqan bolatyn. Sol maqalasynda Elbasy ulttyq ónerimizdi, mádenıetimizdi nasıhattaýdy, ulttyq sıpatymyzdy jańǵyrtyp, elimizdiń rýhanı murasyn kórsetý qajettigi jóninde aıtyp ótken edi. Sol kezde bizdiń arnada birqatar talqylaýlar ótip, biz de osyǵan ózimizdiń úlesimizdi qosaıyq dep, sol talqylaýlardyń nátıjesinde «Men qazaqpyn» megajobasy dúnıege keldi. Ótken jyly bul aýqymdy jobaǵa 3000-nan astam úmitker ótinish bildirip, oblystyq irikteýge 700-deı adam qatysqan bolatyn, al Astanada ótken televızıalyq jobaǵa 57 ónerpaz baq synasyp, ónerlerin ortaǵa saldy», - dep atap ótti Erlan Qarın.

Onyń aıtýynsha, bul joba munymen toqtap qalmaı, ármen qaraı jalǵasyn tabady.

«Bıyl «Men qazaqpyn» jobasyna elimizdiń 14 aımaǵynan 170 aýdan qatysady dep josparlanýda. Sondaı-aq, ádettegideı sheteldegi qandastarymyzdy tartý úshin Reseıdiń Astrahan, Mońǵolıanyń Baıan-Ólgeı jáne Qyrǵyzstanda uıymdastyrý jumystaryn júrgizetin bolamyz. Bul joba ulttyq tól ónerimizdi damytý ǵana emes, jańa esimder ashýmen qatar, elimizdegi ánshi-termeshiler men kúıshilerdiń ónerin keńinen nasıhattaýǵa múmkindik beredi»,- deıdi Ulttyq arna basshysy.

Brıfıń barysynda Qamshy.kz aqparat agenttigi tilshisi Ulttyq arna basshysy Erlan Qarınge «Jelide synǵa ilikken Erbolat Bedelhannyń jobasyna qatysty ne aıtasyz?» degen suraq qoıdy.

Arna basshysy áńgimeni arydan bastap, Qazaqstan arnasynda ulttyq ónerdi dáripteıtin baǵdarlamalar tek bir ǵana emes, olardyń kóp ekenin tilge tıek etti de, olardy atap ótti.

«Bizde taǵy bir ulttyq ónerdi dáripteıtin osyndaı úlken joba qolǵa alyndy. Bir aıdyń kólemindeı boldy, ár apta saıyn jeksenbi keshki ýaqytta «Júrsinniń júırikteri» atty aıtys jobasy júrip jatyr. Munyń barlyǵyn aıtyp otyrǵan sebebim, ózderińiz kórip otyrsyzdar Ulttyq arnanyń aqparattyq saıasatyndaǵy negizgi maqsat – ulttyq ónerimizdi, kúı, terme, jyr, dástúrli án, aıtys – osynyń barlyǵyn qolǵa alyp, nasıhattap kele jatyrmyz. Biraq, sonymen qatar, biz jastardyń da talabyn eskerýimiz qajet. Olardyń da qazirgi zamanaýı mýzykalardy unatatynyn da este ustaýymyz kerek. Sondyqtan, bizde ár túrli jas ókilderine arnalǵan túrli jobalar qarastyrylǵan. «Men qazaqpyn», «Júrsinniń júırikteri» ulttyq ónerge arnalǵan bolsa, taǵy da estradalyq ánderge arnalǵan «Umytylmas ánder» jobasy bar. Sonymen qatar, bizdiń jasóspirimder, jastar kóretin jobalar bastaldy. Biraq olar basqa ýaqyttarda, jastar kóp jınalatyn túngi ýaqyttarda kórsetiledi», - dep jaýap berdi Erlan Qarın. Sózin jalǵastyra kele, Ulttyq arnada qandaı joba bastalsa da barlyǵy tek halyqtyń múddesi úshin jasalatynyn, negizgi maqsat keń aýdıtorıa jınaý ekendigin aıtty.

«Ulttyq arna múmkindiginshe keń aýdıtorıaǵa jumys isteýi kerek dep oılaımyn. Kórermenderdi ózine kóbirek tartýy tıis. Biz qazir terme, kúıdi Ulttyq arnada shyǵaryp jatyrmyz deımiz, eger ony eshkim qaramaıtyn bolsa, arnanyń aldynda sonshalyqty keń aýdıtorıa jınalmaıtyn bolsa, biz ony kimge qalaı nasıhattaımyz?! Sondyqtan, meniń oıymsha, barlyq kórermenniń suranysyn eskerip otyrýymyz qajet. Bulardan da basqa bizdiń qyzyqty, tartymdy jobalar daıyndap jatyrmyz, olardy aldaǵy ýaqytta kóretin bolasyzdar», - dedi Erlan Qarın.

Aıta ketsek, Qazaqstan arnasynda qanshama ýaqyttan beri daýdyń ortasynda júrgen «91» tobynyń prodúseri, Q-pop stıliniń «janashyry» Erbolat Bedelhannyń «Q-pop Idols» realıtı bastaý alǵan bolatyn. Prodúserdiń bul jobasyna jeli qoldanýshylary narazylyq bildirip, Ulttyq arnadan kórsetilmeýin talap etken edi.

Jeli qoldanýshylary Ulttyq arnada kórsetilip júrgen Erbolat Bedelhannyń Q-pop stıline baǵyttalǵan baǵdarlamasyna qatysty narazylyq bildirip, túrlishe pikirler jazǵan bolatyn. Dástúrli óner maıtalmany, belgili ánshi Sáýle Janpeıisova óz paraqshasynda atalmysh jobanyń ulttyq múddemizge saı kelmeıtin alǵa tartyp, arna basshysyna ashyq hat ta joldaǵan.