Qamshy.kz aqparat agenttigine Almaty oblysynan Gúlsanat esimdi otandasymyz habarlasyp, basyndaǵy qaıǵysyn aıtyp, kómek surady.

Vıdeoúndeý joldaǵan úsh balaly kelinshektiń aıtýynsha, kúıeýi eki jyldan beri Qytaıdan elge orala almaı jatyr eken.

«Esimim – Gúlsanat, Kerbulaq aýdany, Basshı aýylynda turamyn. Ózim úsh balanyń anasymyn, kúıeýim Qytaıda. Qytaı pasportynyń bitýi sebebinen 2016 jyly 20 naýryzda ketkennen elge áli orala almaı otyr. Sol elde pasportyn tartyp alyp, ál kúnge deıin bermeı jatyr. Al biz bolsaq myna jaqta áreń kúneltýdemiz», - dep qynjylady úsh balanyń anasy.

Jas kelinshektiń aıtýynsha, qystaı talaı azaptardy basynan keshirgen eken.

«Meıirimdi kisiler kómektesip te jatty, syrtqa shyǵyp erkek bolamyn, úıge kirip áıel bolamyn. Áıteýir ólmestiń kúnin kórip jatyrmyz», - dep kóz jasyna erik bere otyryp, qınalǵanyn jetkizdi.

Óz sózinde Qazaqstan Úkimeti men jaýapty laýazymdy tulǵalardan kómek surap, jarynyń Qazaqstanǵa oralýyna jaǵdaı jasaýyn surady.

«Kúıeýim ketkeli eki jyl boldy, sol ýaqyttan beri kórmegenim joq. Úsh urpaǵym úshin ómir súrip kelemin. Amaldyń joǵynan áreń degende shydap júrmin. Úlken ulym Qytaıda týylǵan, qalǵan eki balamdy osy elde dúnıege ákeldim. Ekeýi Qazaqstannyń azamaty, men de osy eldiń azamatymyn. Al kúıeýim sol Qytaıda týylǵan. Bul jaqqa kelgende sol Qytaı pasportymen vıza ashtyryp kelip turatyn. Vızasynyń ýaqyty bitkendikten elge qaıtadan orala almaı otyr. Qazir, tipti, sóılesýimiz de qıynǵa tústi. Wechat jelisinde sóılesip turatynbyz, qazir ol jerde de sóılese almaıtyn boldyq, habarsyz qaldyq. Qazaqstandaǵy keıbir meıirimdi aǵalardyń arqasynda qystan aman-esen shyqtym. Endi ary qaraı qalaı ómir súremin, kúıeýim joq, bilmeımin», - deıdi úsh balanyń anasy.

Sóziniń sońynda: «Qazaqstan Otanym, Qazaq elim dep kelgen em,

                                    Urpaq úshin ótip jatyr azapty meniń kúnderim.

                                    Basqa tússe baspaqshyl degen eken

                                    Tiri jesir, tiri jetimniń kúıin keshtim», - dep kúıindi.

Aıta ketsek, sońǵy ýaqytta Qytaıdaǵy qandas baýyrlarymyzǵa qatty qysym jasalyp jatqany belgili. Sonyń saldarynan azap shegip otyrǵan bir emes, birneshe januıa bar.